“Камертон-2” шоуны дөрөвдүгээр шатны байдлаар шилдэг 16 оролцогч тунаж үлдээд байгаа билээ. Тус шоуны зохион байгуулагчид шилдэг 16 оролцогчийг албан ёсоор зарлаж, шоу цаашид реалити хэлбэрээр үргэлжлэх тухайгаа илэрийлсэн. Тодруулбал, шилдэг 16 залуу “Камертон” хамтлагийн дөрвөн гишүүний удирдлаган дор дөрөв хуваагдаж жинхэнэ мэргэжлийн хамтлагийн түвшинд бэлтгэл сургуулилтаа хийн сүүлийн шатандаа өрсөлдөх юм байна. Мөн төслийн багийнхан шилдэг 16 оролцогчтой хоёр сарын хугацаанд ажиллах албан ёсны гэрээ хийсэн бөгөөд хамгийн сонирхолтой нь энэхүү гэрээний дагуу оролцогчдыг цалинтай бэлтгэл хийх заалтыг тусгажээ.
Цалингийн хэмжээ 1 сая төгрөг гэнэ. Өндөр цалинтай учир тэр хэрээр оролцогчдод ч шаардлага өндөр тавих гэнэ. Тиймээс оролцогчид үлдсэн хугацаанд бүх анхаарлаа зөвхөн шоундаа хандуулан дууны бэлтгэл сургуулилтаа өндөр түвшинд хангах зорилт тавин ажиллах юм.
Ийнхүү Монголын орчин цагийн залуусын өнгө төрхийг илтгэх хэмжээний шилдэг boyband болох зорилгод залуус бүх авьяас чадвар, ур ухаанаа дайчлан хамгийн сүүлийн чухал шаттай нүүр тулан иржээ. 16 оролцогч нэг байранд амьдран хөгжмийн бэлтгэл хийх бөгөөд одооноос оролцогчдын бие бялдрын хөгжил, гадаад дүр төрх, гоо сайхан, хувцаслалт гээд бүхий л талаас нь анхаарал хандуулан ажиллаж байгаа гэнэ.
Ө.Халиун
