Урд хөршид амьдарч байхдаа “Хятадын хөгжмийн зах зээлд өөрийн байр суурийг бүрдүүлнэ” гэж амлаж байсан дуучин С.Сэрчмаа өдгөө бодлоо өөрчилсөн бололтой. Тэрээр шинэ цомгийнхоо ажилд орсон төдийгүй “Sally” нэртэй студиэ тун удахгүй нээх гэнэ. Энэхүү студидээ тэрээр рок попын уран бүтээлчдээс гадна шинэ залуу хамтлаг, дуучдыг урих аж. Уг студийн онцлог нь дуу бичлэг, клип хийхээс гадна шоу тоглолт зохион байгуулах, уран бүтээлчдэд зориулсан гоёлын тасаг бүхий дэлгүүртэй байх гэнэ. Энэ ч утгаараа, дуучин бүсгүй чанартай тоног төхөөрөмж, тохилог орчныг бий болгохоор шаргуу ажиллаж эхэлсэн бөгөөд томоохон компаниудаас туслалцаа авч буй юм байна. Харин монгол дуунаас бүрдсэн ээлжит цомгийнх нь ажил хэдийнэ дуусах шатандаа орсон тул ирэх есдүгээр сард хэвлэлтэд явуулахаар зэхжээ.
Дашрамд, тэрээр DJ Шамантай хамтран дуулсан нэгэн дууныхаа клипэнд тун удахгүй орохоор зэхэж буй гэнэ.
Ө.Халиун
