ХБК-ийг 2010 онд дүүргэсэн З.Номин хэмээх уран бүтээлчийн монгол дахь анхны бие даасан тоглолт энэ сарын 29-нд болох гэж байна. Тэрээр АНУ-ын Сант-Льюс хотод 4 удаа морин хийл буюу виолончель хөгжмийн тоглолт хийж байжээ. Энэ жилээс АНУ-ын Техас мужийн “Southern Methodist University”-д мэргэжлийнхээ чиглэлээр элссэн хөгжимчин бүсгүй Америкийн шилдэг оркестрын хөгжимчидтэй нэг гэрт амьдарч, тэднээс их зүйлийг суралцсан байна. З.Номин чадамгай тоглолт, авьяасынхаа ачаар америкийн виолончель хөгжимчин Петр Майрсын дэмжлэгийг хүлээж, АНУ-д бүтэн тэтгэлэгтэйгээр хөгжмийн боловсролоо дээшлүүлэх боломжтой болсон байна.
Ийнхүү гадны уран бүтээлчидтэй хамтран тоглож, ур чадвараа ахиулсан З.Номин эх орондоо хийж байгаа анхны бие даасан тоглолтондоо орос, францын зохиолчдын манайд өмнө нь тоглогдож байгаагүй бүтээлүүдийг тоглохоор бэлтгэж байна. Түүний тоглох хөгжмийн жагсаалтанд Францын хөгжмийн зохиолч Клод Дебуссийн хамгийн сүүлийн уран бүтээлүүдийн нэг Cello Sonata орж байгаа. Энэ бүтээлийн тухай дэлгэрүүлэхэд зохиолч цутгамал хөгжмийн зэмсгүүдэд зориулан 6 сонат бичихээр төлөвлөсний хамгийн эхнийх нь виолончельд зориулсан энэхүү сонат юм. 1915 онд бичигдсэн энэ бүтээлийг морин хийлд зориулсан орчин цагийн хамгийн шилдэг бүтээл гэж үнэлдэг байна. Морин хийлийн гайхамшигтай, хүчтэй аялгууг мэдрэхийг хүсвэл та 29-ний өдрийн 19 цагаас Улсын Филармоний концертын их танхимыг зориорой.
