Хошин урлагийнхан нэгдэж "Помогите нам", "Помогите нам-2" буюу "Хуваарьгүй нислэг" цуврал хоёр инээдмийн уран сайхны киног үзэгчдийн хүртээл болгосон билээ. Тус хоёр киноны найруулагчаар ажилласан "Zaya\'sh" студийн найруулагч Ш.Даваадорж энэ удаад "Помогите нам" киноны гуравдугаар анги буюу "Бидэнд туслаач" инээдмийн киноны зохиолыг бичиж найруулан ЗD-гээр бүтээсэн байна. Энэ сарын 25-нд нээлтээ хийх юм байна.
Уг бүтээлийн өмнөх хоёр ангид Сибир болон Монголын говьд гол үйл явдал нь өрнөдөг билээ. Тэгвэл энэ удаагийн ангид гол үйл явдал нь Хөвсгөл далайд үргэлжлэх гэнэ. Мөн энэ шинэ ангийн үйл явдал өмнөх ангиудынхтай холбогдохгүй юм байна. Кинонд тоглох уран бүтээлчдийн хувьд бага зэрэг өөрчлөлт орж, Гавьяат жүжигчин Б.Батзаяа, "Эрхэм элч" уран бүтээлийн нэгдлийн захирал С.Лхагвасүрэн, жүжигчин Б.Нямхүү, М.Саранцэцэг, Р.Адъяа, хошин урлагийн жүжигчин Чапи болон DZ-Man буюу Б.Дашзэвэг нар тоглож байгаа гэнэ.Үүнээс гадна өөр шинэ жүжигчдээр багаа бүрдүүлсэн аж.
