Өмнөд Солонгосын реппэр PSY-гийн “Ганнам стайл” дуу Их Британийн хөгжмийн чартыг өнгөрсөн долоо хоногоос тэргүүлж эхэллээ. Тэгвэл Хойд Америкийн “Billboard” чартын хоёрдугаарт бичигдэж байна. Энэхүү чартыг “Maroon-5” хамтлагийн “One more night” бүтээл тэргүүлж байгаа юм.
Хөгжим шүүмжлэгчдийн ярьснаар энэ долоо хоногт “Ганнам стайл” дуу “Billboard” чартыг тэргүүлж магадгүй байгаа аж. Барууны хотуудын гудамж талбайд цугларсан залуу PSY-гийн “морин” бүжгийг бүжиглэж, зарим тохиолдолд ийм бүжгийн тэмцээн зохион байгуулагдаж, ёстой л дэлхий нийтийг хамарч чаджээ.
Реппэр саяхан “The Sun” сонинд өгсөн ярилцлагадаа “Би бүх дэлхийг байлдан дагуулна гэж санаагүй л дээ. Гэхдээ одоо надад ийм бодол төрдөг болсон. Миний цаашдын уран бүтээлийг ямар байх бол хэмээн үзэгчид төсөөлж байгаа. Чанартай, этгээд клип хийхээр төлөвлөж байна” гэжээ.
“Ганнам стайл” хоёр долоо хоногийн өмнө UK чартын 37 дугаар байрт бичигдэж байсан юм. “YouTube” сайтаар клипийг 330 гаруй сая удаа үзсэн байна.
