Өвөл цагийн нээлтээ хийгээд удаагүй байгаа ДБЭТ-ынхан ээлжит бэлгээ ард түмэндээ задлахаар бэлдэж эхэлжээ. Тэд энэ удаад ОХУ-ын “Большой театр”-ын 10 гаруй балетчинтай бүрэлдэхүүнийг эх орондоо урьсан байна. Тэд ч манай урилгыг найрсаг хүлээн авсан мэдээтэй. Нэг үгээр хэлбэл, Европт төдийгүй дэлхийд суу алдраа гайхуулсан сүрлэг театрынхан ирэх сарын 2-нд манай оронд хүрэлцэн ирэхээр болжээ. Онцлон хүргэхэд, хэзээнээс л Оросын алдарт “Большой театр” нийгмийн дээд зиндааныхны цугладаг газар байв. Одоо ч энэхүү байдлаа хадгалсан хэвээр.
Хатагтай нар хамгийн сайхан даашинз чимэг зүүлтээрээ гоёж, харин эрчүүд хар костюмаар гангарна. Зургаан жилийн хугацаанд засвар хийсэн тус театр өнгрөгч аравдугаар сарын 28-ны өдөр шинээр үүд хаалгаа нээгээд буй юм. Нээлтийн ёслолын арга хэмжээний тасалбар 1,5 сая рубль буюу ойролцоогоор 65 сая орчим төгрөгийн үнэд хүрч байсан байна. Тухайн өдрийн өглөөнөөс эхлээд театрын гудамжинд хөдөлгөөн ихтэй байжээ.
Түгжрэл ихтэй байснаас зочид нээлтийн үйл ажиллагаанд хожигдох шахсан гэдэг. Гэвч энэ байдал нь тэднийг ер бухимдуулаагүй гэдгийг Оросын томоохон сайтууд тухайн үед онцолж байсан юм. Харин ёслолын арга хэмжээг ОХУын ерөнхийлөгч Дмитрий Медведев нээж үг хэлж байв. Тэрбээр засварын үеэр театрын талбайг хоёр дахин томруулж, газар доогуур байгууламж барьж, гол тайзыг зургаан давхар байшинтай харьцуулам Европын хамгийн томд орох тайз болсон талаар тодотгож байсан аж.
Мөн XIX зууны үеийн интерьерийг дахин сэргээн засварлаж, танхимын алтаар бүрэх заслын ажлыг Оросын 156 мэргэжилтнүүд жилийн турш хийсэн бөгөөд 981 квадрат метр газрыг нийт 4,5 орчим кг алтаар бүрсэн байна.
О.Сэлэнгэ
