НЬЮ-ЙОРК. /ВВС/. "Disney" кино компани "Оддын дайн" алдарт кино цувралыг бүтээсэн нэрт найруулагч Жорж Лукасаас кино компанийг нь 4 тэрбум доллараар худалдан авчээ. "Оддын дайн"-ыг шинэ залуу үеийн киночдод хүлээлгэн өгөх цаг болжээ" хэмээн Жорж Лукас хэлсэн байна. Харин "Disney" кинокомпани тус киноны ээлжит 7 дугаар ангийг 2015 он гэхэд гаргахаар төлөвлөөд байгаа гэнэ. Үүний дараа 8 ба 9 дүгээр анги гарах бөгөөд 2-3 жил тутамд шинэ анги бүтээх аж. Сүүлчийн анги нь 2005 онд гарсан уг киноны үргэлжлэлийг үзэгчид тэсэн ядан хүлээсээр байна.
"Disney" компани нь "Lucasfilm" компанийг худалдан авах төлбөрийн хагасыг нь бэлэн мөнгөөр харин үлдсэнийг нь 40 сая ширхэг хувьцаагаар хийх гэнэ.
"Оддын дайн" киноны эхний анги нь анх 1977 онд дэлгэцнээ гарч байв. "Сүүлийн 35 жилийн турш "Оддын дайн" кино нь нэг үеэс нөгөө үед хэрхэн дамжиж буйг харж байгаа нь надад сайхан сэтгэгдэл төрүүлж байлаа. "Оддын дайн" нь надаас урт насална гэж би ямагт үздэг бөгөөд амьд ахуйдаа халаагаа өгөх нь чухал байлаа" хэмээн Лукас ярьжээ.
Тэрбээр "Disney””-гийн ивээл дор байгуулагдах компанид ажиллах бөгөөд "Оддын дайн" цуврал киног бүтээхэд зөвлөхөөр ажиллах гэнэ.
С.Амар
