Төрийн Соёрхолт зураач Ц.Цэгмэдийн “Эртний сайхан” нэртэй уран бүтээлийн үзэсгэлэн “СУВД“ арт галерейн үзэсгэлэнгийн танхиbд 2012 оны арваннэгдүгээр сарын 23 нд 17.00 цагаас нээлтээ хийх гэж байна. Монголчууд балар эртнээс эхлэн хад чулуун дээр сайн сайхныг бэлгэдэн ерөөн дээдэлж түүнийгээ тахин шүтэж ирсэн түүхтэй бөгөөд үүний үргэлжил нь орчин үед зураач Ц.Цэгмэдийн уран бүтээлд илэрлээ олсон байдаг.
Түүний зургууд нь дүрслэх урлагийн илэрхийллийн арга болох, дүрсийн бэлгэдэл, хэлбэр, галбир, өнгө, хөрвөсийн бэлгэдэл зэргээр илэрхийлэгдэж бидэнд сайн сайхныг ерөөсөн бэлгэдэл бүхий зургууд болсон байна. Ц.Цэгмэдийн бүтээлд морь, үхэр, тэмээ, хонь, ямаа, нохой, загас зэрэг амьтны дүрслэл их байдаг бөгөөд морины дүрсээр амьдралын эрч хүч,хийморь, үхэрээр баян чинээлэг амьдрал, тэмээгээр аз жаргалтай амьдрал, хониор амар амгалан амьдрал, ямаагаар өөдрөг хувь заяа, нохойгоор үнэнч шудрага анд нөхөдийг, загасаар сонор соргог, өсөн үржихийг бэлгэдэн өгүүлсэн байдаг.
Дүрслэх урлаг сонирхогчид, уран бүтээлчид та бүхнийг үзэсгэлэнгийн нээлтэнд хүрэлцэн ирэхийг урьж байна.
