Монголын үзэгч түмэндээ тайз, дэлгэцийн олон дүрээрээ танил болж хайр хүндэтгэлийн хүлээхийн зэрэгцээ, драмын урлагийн шилдгүүдийг тодруулдаг "Гэгээн муза" наадмын санаачлагч Улсын драмын эрдмийн театрын жүжигчин, Монгол Улсын гавьяат жүжигчин С.Сарантуяа эзэн Чингис хааны мэндэлсний 850 жилийн ойн өдөр "Ардын жүжигчин" цол тэмдгээр шагнууллаа.
Цэл залуухан 14 наснаасаа эхлэн урлагт өөрийн амьдрал, уран бүтээлээ зориулж үнэтэй хувь нэмрээ оруулсан, тэр дундаа драмын урлагт олон сайхан дүр бүтээсэн түүний гавьяаг өндрөөр үнэлж, ийнхүү Ардын жүжигчин цолоор шагнасан юм.
Ардын жүжигчин С.Сарантуяагийн амьдрал уран бүтээлээс дурьдвал, Багшийн дээд сургуулийн кино драмын ангийг 1980 онд төгссөн. Үүнийхээ дараагаас Драмын театрт жүжигчнээр орж өдийг хүртэл ажиллаж байна. Хамгийн анх Ардын жүжигчин төрийн соёрхолт Оюун гуайн зохиол “Ширүүн тулааны өмнөх” түүхэн жүжгийн Бурмаагийн дүрийг бүтээснээс хойш драмын тайзнаа 100 гаран, кино дэлгэцнээ 20 гаруй гол болон туслах дүрийг бүтээсэн нэгэн юм.
WWW.URLAG.MN
