Зураач Ц. Амаржаргал "Цэцгэн Урлан" нэртэй анхны бие даасан үзэсгэлэнгээ олны хүртээл болгохоор зэхэж байна. Цэндбаатарын Амаржаргал нь 2010 онд Дүрслэх Урлагийн Дээд Сургуулийг Монголын Урчуудын Эвлэлийн Хорооны нэрэмжит шагналт зураач Ц. Нарангэрэл багшийн урланд суралцан төгссөн юм. Курсын болон дипломын ажлуудаа өөрийн хамгийн дуртай наранцэцгээр хийж байсан бөгөөд одоог хүртэл цэцгээ тасралтгүй зурсаар энэ багахаан туршлагаараа анхны үзэсгэлэнгээ гаргах гэж байна. Дэлхий ертөнцийн сайн сайхан, гоо үзэсгэлэнгийн бэлэгдэл нь цэцэг хэмээн тэрбээр боддог ажээ. Зураач хүн хамгийн сайн мэдэх ойрхон мэдэрсэн зүйлээ хийвэл тэр нь шилдэг ажил болж байдаг. Ц.Амаржаргал нь цэцгээр дамжуулан өөрийгөө илэрхийлэхийг хүсдэг уран бүтээлч юм. Түүний үзэсгэлэн энэ сарын 26-наас ирэх сарын 8 хүртэл үргэлжилнэ.
www.urlag.mn
