Монголын эмэгтэй зохиолчдоос толгой цохиж яваа зохиолч Б.Шүүдэрцэцэгийн “Ану хатан” романаас сэдэвлэн, “Шүүдэр” продакшны бүтээж буй “Ану хатан” түүхэн уран сайхны кино үзэгчдийн дунд хүлээлт үүсгээд байгаа билээ. Жил дамнан бүтээж буй уг кино өнгөрсөн аравдугаар сард албан ёсны трэйлерээ дэлгэж, нээлтийн товоо арванхоёрдугаар сард хэмээн зарлаад байсан ч тодорхой шалтгааны улмаас хойшлуулаад байсан. Тэгвэл “Ану хатан” кино нээлтээ энэ сарын 18-нд хийхээр эцэслэн шийдсэн гэнэ.
“Ану хатан” киноны үйл явдал, өрнөлөөс хамаарч зургийг дөрвөн улирал дамнан авахаар төлөвлөсөн хэмээн кино багийнхан дуулгасан. Киноны зөвлөх болон ерөнхий найруулагчаар ардын жүжигчин Г.Жигжидсүрэн, ерөнхий зураглаачаар Д.Ангараг, ерөнхий зураачаар Ж.Цог, ерөнхий продюсерээр Д.Болдхуяг, ерөнхий найруулагчаар жүжигчин, найруулагч Т.Алтантуяа ажиллаж байгаа бөгөөд киноны хөгжмийг Америкт ажиллаж, амьдарч буй С.Сансаргэрэлтэх бичжэээ.
Ану хатны дүрд “Voice” группийн дуучин Д.Отгонжаргал, Галдан хаанд дуучин, жүжигчин М.Мягмар, Очирт цэцэнд ардын жүжигчин Г.Мягмарнаран, Юм-Агас хатанд гавьяат жүжигчин С.Сарантуяа, Мандарваад жүжигчин О.Долгор, Асралтад гавьяат жүжигчин Ж.Оюундарь, Данжила жанжинд жүжигчин Г.Ариунбямба, Сэнгэ хааны том хүү Цэвээнравданд П.Баттөр, бага хүү Сономравданд жүжигчин Т.Билэгжаргал, Ахай хатны дүрд мисс Б.Бадамцэцэг нар тогложээ.
Энэхүү уран бүтээл “Мандухай цэцэн хатан”-аас хойш 29 жилийн дараа бүтээгдэж буй түүхэн хатны тухай хоёр дахь кино гэдгээс гадна эмэгтэй зохиолч, эмэгтэй ерөнхий найруулагч, эмэгтэй гол дүртэйгээрээ онцлог бүтээл болж байгаа ажээ.
Ийнхүү “Ану хатан” түүхэн уран сайхны киноны зураг авалтын үеийн фото зурагнуудаас та бүхэндээ хүргэж байна.
Та бүхнийг урлагийн тэнгэр ивээг…
www.urlag.mn
