Кино урлаг сүүлийн жилүүдэд хурдацтай хөгжиж байгаа билээ. Манай улс ч энэ хөгжлөөс хоцрохыг хүсэхгүй нь лавтай. Тиймээс “Ялгуун”, “Метеор”, “А plus” студийн уран бүтээлчид хамтран удаан хугацаанд судалсны эцэст Монголын анхы 3D киноны зураг авалтыг амжилттай хийж дуусгалаа. А.Миеэгомбын бүтээл “Сайн, муу, хэрцгий” нэртэй энэхүү кино толгойтой бүхэн нь төрийн алба руу шургалахыг хүсдэг болсон өнөөгийн нийгмийг адал явдалт, инээдмийн төрлөөр дамжуулан шүүмжилжээ.
Технологийн хувьд 3D-гээс гадна 5.1 dolby surround системийн дуугаралттайгаар бүтээгдэн гарч байгаа тус киноны гол дүрийг СТА, “Х-ТҮЦ” продакшны жүжигчин Д.Түвшинтөр, СТА, жүжигчин Г.Эрхэмбаяр, “Захиалгат инээд” хамтлагийн жүжигчин Б.Даулетжан нар болон жүжигчин Баярмагнай, Ганцэцэг, Алтаншагай, Нэргүйбаатар нар тоглосон байна. Кино өнгөрсөн сарын 30-наас “Тэнгис”, “Өргөө” кино театрын дэлгэцнээ гарч эхэлсэн бөгөөд энэ сарын 02-нд албан ёсны нээлтээ хийсэн юм. Монголын анхны 3D киноны Ерөнхий ивээн тэтгэгчээр “Lebra design and solution” компани, Дэвшилтэт технологийг дэмжигч “Univision” ХХК хамтран ажиллажээ.
