Америкийн нэрт рэппэр, жүжигчин LL Cool J ирэх дөрөвдүгээр сарын 30-нд “Authentic” нэртэй 14-дэх шинэ цомгоо гаргахаар төлөвлөж байгаа тухай өчигдөр фэнүүддээ дуулгажээ. LL Cool J шинэ цомгийнхоо ажилд “429 Records”-той хамтран ажиллаж байгаа бөгөөд хип хоп хөгжмийн ертөнцөд олон мянган шүтэн бишрэгчид нь түүний шинэ уран бүтээлийг тэсэн ядан хүлээж байсан юм. Учир нь тэрээр хамгийн сүүлд 2008 онд “Exit 13” цомгоо сонсогчдын хүртээл болгосоноос хойш дахин ганц ч цомог гаргаагүй байсан юм.
Харин тэрээр ирэх дөрөвдүгээр сард бэлэн болох шинэ цомгийнхоо талаар жинхэн хип хоп хэмнэл, хэзээ ч давтагдашгүй таашаалыг фэнүүддээ мэдрүүлэх болно хэмээн ярьсан гэнэ. Тэртээ 1984 оноос өөрийн уран бүтээлийн карейрийг эхлүүлсэн LL Cool J “Billboard”-ийн түүхэнд дуу нь хамгийн их хит болж байсан шилдэг рэппэрүүдийн тоонд ордог байна.
Тэрээр энэ сарын арванд алдарт Грэммийн шагнал гардуулах ёслолыг хөтөлснийг хөгжим сонирхогчид мэдэх билээ.
Э.АНХТУЯА
