Америкийн кино академийн дээд шагнал 85 дахь удаагийн “Оскар”-ын наадам Лос-Анжелес хотноо улаан хивсний ёслолоор эхлээд байна. Тус наадам нь Холливүдийн “Долби” театрт зохион байгуулагдаж байгаа бөгөөд сүүлийн жилүүдэд хамгийн тааварлашгүй үр дүн гардаг боллоо хэмээн шүүмжлэгчид дүгнэж байна.Кино шүүмжлэгчдийн үзэж буйгаар энэ жилийн "Шилдэг кино" номинацид Бен Аффлекийн найруулсан “Argo” кино тэргүүлэх өндөр магадлалтай аж.Харин “Шилдэг эрэгтэй жүжигчин” номинацийн эзнээр “Lincoln” кинонд тоглосон Дэниэл Дэй-Льюс тодорно хэмээн дүгнэж байгаа бол “Шилдэг эмэгтэй жүжигчин”-ий шагналыг Осама бин Ладеныг ангуучлах үйл явцыг харуулдаг “Zero Dark Thirty” кинонд тагнуулчийн дүрд тоглосон Жессика Честэйн хүртэх магадлалтай гэж үзжээ. Энэ жил “Оскар”-ын зохион байгуулагчид дэлгэцэнд анх гараад хагас зуун жилийг ардаа орхисон Жеймс Бондын тухай киноны ойн баярт ихээхэн ач холбогдол өгөн ажилласан гэнэ. Хэрхэн бэлдсэнийг удахгүй болох шагнал гардуулах ёслолоос үзэж болох нь. Жеймс Бондын тухай сүүлийн “Skyfall” кино дэлхий даяар нэг тэрбум долларын ашиг олсон байна.Дашрамд дурьдахад, “Оскар”-ын номинаци бүрт Америкийн кино академийн 6 мянга орчим гишүүн саналаа өгдөг ажээ. Мөн нийт 24 төрөлд шагнал гардуулдаг юм.
Б.Соёлмаа