Охид, эмэгтэйчүүдийн эсрэг хүчирхийлэлтэй тэмцэх “V-Өдөр” хөдөлгөөний хүрээнд АНУ-ын зохиолч Eve Ensler-ийн “The Vagina Monologues” буюу "Үтрээний хүүрнэл" хэмээх шилдэг хандивын жүжгийг тоглосон юм. Жүжиг бие даасан богино хүүрнэлүүдээс бүрдэх бөгөөд жил бүр зохиолч шинэ хүүрнэлийг онцгойлон нэмж тухайн орны “Үтрээний хүүрнэл” жүжигт оруулдаг аж. Тиймээс энэ жил уг жүжигт “Өмнөтгөл”, “Үс”, “Хэрвээ үтрээ хувцас өмсөж, үг хэлдэг байсан бол”, “Үер”, “Үтрээний сургалт”, “Тааламжтай болон тааламжгүй баримт”, “Учир нь тэр харах дуртай байсан”, “Би үтрээгүй болсон гэдгээ хэлвэл яах бол”, “Миний үтрээ ууртай байна” зэрэг 19 хүүрнэл оржээ.
Хэрвээ үтрээ хувцас өмсдөг байсан бол юу өмсөх байсан бол оо гэж та бодож байсан уу? Харин судалгаанд оролцсон бүсгүйчүүд үтрээ хувцас өмсдөг байсан бол дэгжин малгай, хээнцэр, нарны шил, дэрэвгэр хормойтой богино даашинз, өндөр өсгийт, өөрт эвтэйхэн жинсэн өмд гээд өдөр бүр л өөр өөрөөр гоёх байсан гэж хариулжээ. Өөрөөсөө асууж үзээгүй олон асуулттай энд тулгарсан юм. Мөн жүжигт гадаадын тоо баримт, тэдгээр бүсгүйчүүдэд тохиолдсон баяр, гунигийг тухай “Миний бяцхан бэлэг эрхтэн хөөрхийлөлтэй байж болох байлаа”, “Ал-ыг тунхаглая”, “Үтрээг баярлуулах дуртай эмэгтэй”, “Би тэр өрөөнд байсан”, “Бид эцэстээ тулж байна” “Бослого” хүүрнэлээр дамжуулан үзэгчдэд хүргэсэн юм.
Энэ жүжгийн найруулагчаар Э.Өнөрцэцэг хоёр дахь жилдээ хамтран ажиллан “Өөрчлөлтийн төлөөх залуу эмэгтэйчүүд” клубийн гишүүд буюу 30-аад залуу эмэгтэйчүүд үзэгчдийн хүртээл болгосон юм. Уг жүжгийн нэг онцлог бол заавал мэргэжлийн уран бүтээлчид тайзнаа тоглоно гэлтгүй бүсгүйчүүд өөрсдөө “V-Өдөр”-ийн дуу хоолой болон оролцон тоглодог аж. “Өөрчлөлтийн төлөөх залуу эмэгтэйчүүд” клуб нь Монголд анх удаа “The Vagina Monologues” хэмээх хандивын жүжгийг 2011 онд тоглон нь үзэгчдийн хүртээл болгосон бөгөөд энэ жил гурав дахь удаагаа дахин тайзнаа хоёр өдөр тоглолоо. 2011, 2012 онд Монголд “V-Өдөр” аяны хүрээнд “Үтрээний хүүрнэл” хандивын бүтээлийг толилуулж нийт 15.730.580 төгрөгийн орлого олж, Хүчирхийллийн эсрэг үндэсний төв, ЛГБТ төв болон “V-Өдөр” аяны уриалгын дагуу байгалийн гамшигт өртсөн Гайти улсын эмэгтэйчүүдэд хандивлажээ.
www.URLAG.mn
