НҮБ-ын сайн санааны элч, Холливудын жүжигчин Анжелина Жоли хайртынхаа бэлэглэсэн сүйн бөгжтэй яг адилхан хувийг дэлхийд алдартай үнэт эдлэл урлаач Роберт Прокопоор хийлгэж байгаа гэнэ. Зорилго нь тэрээр 250 мянган ам.долларын үнэтэй, эрдэнийн чулуугаар хийсэн сүйн бөгжөө дуудлагаар худалдаж, орлогыг Афганистаны Кабул дахь охидын сургуульд хандивлахаар болжээ. Мөн тэрээр сүйн бөгжөөсөө гадна Брэдээс бэлгэнд авч байсан хэд хэдэн алтан ээмэг, бөгжөө хамтад нь худалдаалах аж. Жоли дүрвэгсэд ихтэй тус хотын хүүхэд, багачуудын боловсролын асуудалд сэтгэл зовниж буйгаа нэг бус удаа ярьж байсан юм. Түүний хэлснээр Кабул хотын охидын сургуульд 200-300 сурагч суралцдаг гэнэ. Жоли ийнхүү хандив өргөхөөр болсон нь хүүхдүүдийн боловсролыг дэмжиж буй сайн санааны илэрхийлэл хэмээн НҮБ-ын дүрвэгсдийн хорооны төлөөлөгчид түүнд талархсанаа илэрхийлжээ. Эх сурвалжийн мэдээлснээр Жолигийн цуглуулгууд ирэх пүрэв гаригаас эхлэн Канзас хотын “Tivol” үнэт эдлэлийн дэлгүүрээр худалдаалагдаж эхлэх юм байна. Харин Жолигийн адил нэрт дуучин Мадонна, телевизийн од Опра Уинфри нар мөн түүний хандивын үйлст нэгдэх болсноо энэ үеэр мэдэгджээ.
