Монголын Үндэсний Кино Урлагийн Академи-аас улс үндэстнийхээ кино урлагийг хөгжүүлэх, дэлхийн тавцанд гаргах, нийгэмд соёл урлагаар үйлчлэх, гоо зүйн боловсролыг олгох, киноны чиг хандлагыг зөв тодорхойлох, болон уран бүтээлчдийг дэмжин урамшуулах, чанаржуулах зорилгоор жил бүр уламжлал болгон зохион байгуулдаг кино академийн дээд шагнал “Academy awards Mongolia -2013” наадмыг гурав дахь жилдээ зохион байгуулах гэж байна. Үүнтэй холбогдуулан наадмын зохион байгуулах хорооны ажилтан Я.Мөнхзаяатай хийсэн ярилцсанаа хүргье.
-“Academy Awards Mongolia 2013” кино наадам хэзээ болох вэ?
– Энэ жилийн кино наадмаа бид 05 сарын 15-18-ний өдрүүдэд хийхээр товлоод бэлтгэл ажилдаа ороод явж байна. Наадам маань ихээхэн онцлогтой болно.
-Наадмын онцлог?
– За юуны түрүүнд “short film” буюу шилдэг богино хэмжээний киног шалгаруулах гэж байгаа. Тиймээс илүү өргөн цар хүрээтэй наадам зохиогдоно. Нийтдээ 18 нэр төрөлд киночид маань өрсөлдөх юм. Урьд жил шилдэг эмэгтэй дүрийн шагнал эзэнгүй байсантай холбогдуулан манай Кино Урлагийн Академиас “Монголын кино урлаг ба эмэгтэйчүүдийн оролцоо” сэдэвт ЭШ-ний бага хурал зохион байгуулсан. 2012 оныг бодвол энэ жил эмэгтэй хүмүүсийн дүрийг тод томруун харуулсан кино цөөнгүй байгаа бөгөд тэд нэлээн хүчтэй өрсөлдөх байх. Мөн бусад орны уран бүтээлчдийн өмнө манай кино наадмын үүд хаалга нээлттэй.
-Кино академиас ном гаргах тухай яригдаж байсан энэ талаар ярьвал?
– Энэ наадамд нэр дэвшиж оролцсон кино, уран бүтээлчдийн танилцуулга бүхий “Монгол Кино” товхимолд хэвлэгдэнэ.
-Кино наадмын бүртгэл хэзээ хаана явагдах вэ?
– МЗХ-ны Хурлын танхимд 04 сарын 01-ээс 05 сарын 10-ны хооронд явагдана.
Энэ хугацаанд бас богино хэмжээний кино наадмын өдөрлөг уулзалтыг 05 сарын 11-13нд МЗХ-ны Хурлын танхимд, “Flash mob” 05 сарын 12-нд УИД-ийн 2 давхарт хийхээр төлөвлөөд байна.
-Шагнал гардуулах ёслолын үйл ажиллагааны талаар мэдээлэл өгвөл?
– Кино наадмын хүрээнд нэр дэвшигч киноны премер, улаан хивсний ёслол “ӨРГӨӨ КИНО ТЕАТР”-т , нээлтийн үдэшлэг “VEGAS”-т, шагнал гардуулах ёслол УДЭТеатрт, хаалтын үдэшлэг “BLUE SKY TOWER”-т зохион байгуулагдана
-Кино наадмын талаарх мэдээллийг хаанаас авч болох вэ?
– Хэвлэл мэдээллээр цаг тухайд мэдээллүүдийг өгнө. Мөн манай web: www.filmart.mn сайтаас болон бусад сайтуудад мэдээ, мэдээллүүдэд тавигдана. МҮОНТ, SBN, TV5, NTV, Эх орон телевиз, www.URLAG.mn, www.DORGIO.mn, www.NEWS.mn гэх мэт сайтууд болон “Монголын Залуучуудын Үнэн” “Өглөөний шуудан”, “Монголын мэдээ” сонингууд зэрэг олон шилдэг мэдээллийн ивээн тэтгэгчтэй байгаа.
-Өргөн цар хүрээтэй наадам болох нь ээ?
– Тэгэлгүй яахав. Мэдээж Монголдоо цорын ганц гэж хэлж болохоор киночдын шилдгийн шилдгүүдээ тодруулдаг баяр, энэхүү наадам жилийн жилд илүү өргөн дэлгэр болж байгаа нь Монголын кино урлаг хөгжиж, дэлхийн төвшинд гарах болсны илрэл болж байна.
-Киночид болон уран бүтээлчдэд хандаад юу хэлмээр байна.
– “Academy Awards Mongolia 2013” кино наадам давтагдашгүй маш олон сайхан зүйлээр дүүрэн байх болно. Кино наадамд оролцох бүх хүмүүс өөрөөр хэлбэл шагналын эзэд үзэгчид гэлтгүй бүгд урлаг соёлоо болон өөрсдийгөө хүндэтгээд ёслолын хувцастай оролцох юм.
Ярилцсан Ц.Чимэдрэгзэн
