Цагтаа дэлхийн хамгийн цуутай загвар өмсөгчдийн нэг явсан Наоми Кемпбелл сүүлийн таван жилийн турш Оросын тэрбумтан Владислав Доронинтой найзалсан билээ. Биелэгжүү орос эр Наомитой гэрлэх санал огт тавиагүй хэрнээ байсхийгээд л үнэт эдлэл бэлэглэж, сэтгэлийг нь уяраасаар байсан юм. Гэлээ ч хэдхэн хоногийн өмнө Доронин шаргал үстэй залуухан бүсгүйтэй нэгэн цэнгээний газар наргисныг хэвлэлээр мэдээлсэн.
Энэ явдлаас хойш удалгүй Доронин, Наоми нар харилцаагаа түр таслахаар шийдэж, тусдаа амьдрах болсон байна.
"Сүүлийн үед Наоми, Доронин хоёрын харилцаа амрагуудын гэхээсээ ажил хэргийн хамтрагч нарын харилцааг санагдуулах болсон. Наоми Доронины бизнест өөрийн дүр төрх, нэр төрөөрөө нэмэр болсон нь гарцаагүй. Тэглээ ч тэд ажил хэрэгтээ анхаарч, бие биенээсээ хэт хол байх болсон нь харилцаа нь хөрөхөд хүргэсэн" гэж ойрын гэх эх сурвалж өгүүлжээ.
50 настай Доронин, 42 настай Наоми нарыг өнгөрсөн гуравдугаар сарын эхээр л Майамид хамт амарч байхыг нь харсаар хойш хамтдаа огт гадуур гараагүй ажээ. Тавдугаар сарын 22-нд Наомигийн төрсөн өдөр болоход Доронин хэрхэн хандах нь хэвлэлийнхний сонирхлыг гойд татаад байна.
www.URLAG.mn
