Та бидний ээж, аавын амьдрал, залуу настай салшгүй холбоотой XX-р зууны дуунууд дахин эгшиглэлээ. 25-р телевизэээс зургаа дахь жилдээ зохион байгуулсан уг тоглолт үзэгчдийг залуу нас, хайр дурлал, гэгээн дурсамж руу нь эргэн хөтөлсөн юм.
"Суварган цэнхэр уулс" "Эхийн сэтгэл" "Орь залуу нас" "Мөрөөдөл" "Хүүхэн хүний хүслэн" зэрэг тэр л үеийн дууг залуу уран бүтээлчид болон 20-р зууны дуучид дахин амилууллаа.Тоглолтод гавьяат жүжигчин Ж.Алтанцэцэг, СТА С.Сэрчмаа, дуучин Дэлгэмөрөн, дуучин Намсрайноров, Жимсээ, Г.Эрдэнэтунгалаг, гавьяат жүжигчин Болормаа, СТА Р.Дэлгэрмаа, Э.Оюумаа зэрэг рок, поп, нийтийн дуучдын уран бүтээлчид оролцлоо.
Дуучин Г.Эрдэнэтунгалаг "20-р зууны дууг жазз, блюз болгон дуулж байна. Үзэгч, сонсогчдод хүрчихсэн дууг дахин дуулна гэдэг хэцүү. Тухайн дуучнаас маш их ур чадвар, цаг хугацаа, хөдөлмөр шаарддаг. Би дандаа болохгүй гэсэн зүйлд тэмүүлэх дуртай. Тийм ч учраас олны танил дууг дахин дуулах дуртай" гэж онцолж байв.
Баянмонгол чуулгын дуучин, гавьяат жүжигчин Уранчимэг "Би өөрөө 20-р зууны дуучин. Жил бүр энэ сайхан тоглолтод урилгаар оролцдог. Хэзээ ч мартагдашгүй дуунуудыг 25-р телевиз жил бүр ийм сайхан тоглолт болгож зохион байгуулж байдагт баярлаж явдаг" гэсэн юм. Энэхүү тоглолтыг анх TV25 телевизийн үүсгэн байгуулагчдын нэг, нэрт сэтгүүлч А.Авирмэд, хөгжмийн зохиолч Р.Энхбазар нар санаачилсан гэдэг. Энэ удаагийн тоглолтын ерөнхий найруулагчаар тус телевизийн сэтгүүлч, найруулагч Ч.Бүрэнжаргал ажиллажээ.
www.URLAG.mn