Боловсрол Шинжлэх Ухааны яамны сайдын 2012 оны 10 дугаар сарын 08-ны өдрийн А/51 тоот тушаалаар "НОМ", хөтөлбөрийг, мөн өдрийн А/52 тоот тушаалаар "АВЬЯАС" хөтөлбөрийг тус тус батлан хэрэгжүүлж байгаа билээ.
Уг хөтөлбөрийн хүрээнд өнгөрсөн баасан гаригт Нийслэлийн Хан-уул дүүргийн Боловсролын хэлтэсээс санаачлан, Япон улсын “Хүүхдийг ивээх сан”, “Хүүхдийн эрх хамгаалах төв”, “Болор өглөө” цэцэрлэг, “Миний найзууд” цэцэрлэг нартай хамтран дүүргийнхээ бүх цэцэрлэгүүдийн дунд “Ном бол бидний толь, Дуу бол бидний авъяас” хэмээх нээлттэй өдөрлөг, бүтээлийн уралдааныг ёслол төгөлдөр зохион байгууллаа.
"НОМ" хөтөлбөрийн хүрээнд бүх цэцэрлэгүүд өөрсдийн заах арга зүйн болоод ажил туршлагийн онцлогийг харуулсан номыг бүтээж түүгээрээ үзэсгэлэн гаргасан бол “Дуу” хөтөлбөрийн хүрээнд хүүхдийн дууны урын санг баяжуулах, дүгээн дэлгэрүүлэх зорилгоор хүүхдийн дууны зохиолч Чулуун, Энхбаяр нарын хамтарсан хүүхдийн дууны номоор нь дууны уралдаан зарласан ажээ. Тус дууны уралдаан нь гоцлолоор, хослолоор, хамтлагаар гэсэн гурван төрлөөр явагдаж шилгүүдийн шалгаруулсан бол цэцэрлэг тус бүрийн бүтээсэн номоос шилдгийн шилдгийг мөн адил шалгаруулсан аж.
Ийнхүү нийт цэцэрлэгүүдийн оролцсон ном бүтээх уралдаанд Хан-уул дүүргийн 73-р цэцэрлэгийн хамт олон “Өсөх нас 1,2” бүтээлээрээ тэргүүн байр эзэлсэн бол 189-р цэцэрлэгийн хамт олон “Хүүхдээ дээдлэн хамтдаа хөгжицгөөе” бүтээлээрээ 2-р байр эзэлж 71-р цэцэрлэгийн хамт олон “Монгол үндэсний наадам тоглоомоор наадхуй” бүтээлээрээ 3-р байр эзэлсэн юм. Мөн 27-р цэцэрлэгийн хамт олон “Том ном”, 35-р цэцэрлэгийн хамт олон “Бидний амжилтын эх булаг” зэрэг бүтээлүүдээрээ тусгай байрын шагналыг хүртжээ.
