Дэлхийн хөгжмийн ертөнцийн 2013 оны шилдгүүдээс түүвэрлэн “UK / BBC Radio No.1” чартуудын шилдэг бүтээлүүдээс хүргэж байна.
“Just Give Me a Reason” / Pink (ft. Nate Ruess)
Инди поп урсгалаар тоглодог “FUN” хамтлагийн дуучин Нэйт Риүстэй хамтарсан “Just Give Me a Reason” хэмээх энэхүү шилдэг уран бүтээл нь Пинкийн зургаа дахь бие даасан “The Truth About Love (2012)” цомгийн удаах хит дуу юм. Дуучин бүсгүй маань одоогоор Австрали, Европ ба Хойд Америкийн орнуудаар аялан тоглолттой байгаа бол “FUN” хамтлагийн хувьд “Why Am I The One” дуугаа клипжүүлээд зогсохгүй Грэммийн “Шилдэг шинэ уран бүтээлч”-ээр тодорсон билээ.
“Sacrilege” / Yeah Yeah Yeahs
Инди рок жанрын гайхалтай бүтээлүүдээрээ алдартай Америкийн “Yeah Yeah Yeahs” хамтлагийг та бид сайн мэдэх билээ. 2000 оноос уран бүтээлээ хийж байгаа охидын “шилдэг” хамтлагийнхан маань 2013.04.16-нд “Mosquito” хэмээх шинэ цомгоо гаргахаар болжээ. Ингээд цомгийн эхний сингл “Sacrilege” дууг зориулж байна.
“What About Us” / The Saturdays (ft. Sean Paul)
Энэ ондоо багтаан дөрөв дэх бие даасан цомгоо гаргахаар ажиллаж байгаа Нэгдсэн Вант Улсын охидын шилдэг хамтлаг “The Saturdays”-ийн тухайд энэхүү дуу нь хамтлагийн бусад уран бүтээлүүдээс илүү олны таашаалд нийцээд байгаа ба клип нь гарсан даруй 24 цагийн дотор сая гаруй удаа “хандалт” авсан гайхалтай бүтээл болжээ.
“Chocolate” / The 1975
Гол төлөв хайр дурлал, секс, үхэл, айдсын тухай өвөрмөцөөр хүүрнэсэн уран бүтээлүүдээрээ дэлхийд танигдаж буй Английн “The 1975” хамтлаг 2012 онд байгуулагджээ. Тэд анхны бие даасан цомгоо энэ жилдээ гаргах төлөвлөгөөтэй байгаа бөгөөд шинэ цомгийн угтал болж гарсан “Sex” / “Chocolate” зэрэг уран бүтээл нь чартуудад амжил арвин яваа юм.
“Biblical” / Biffy Clyro
“14th Floor Records”-той хамтран ажилладаг Шотландын “Biffy Clyro” хамтлагийн зургаа дахь шинэ цомог “Opposites” нэрээр өнгөрөгч 1 сард гарсан байна. Хамтлаг гурван хүний бүрэлдэхүүнтэй бөгөөд дуучин Саймон Нэйл 15 настай байхдаа хамтлагаа ийнхүү байгуулжээ. Тэдний шинэ цомгийн хит “Biblical” уран бүтээлийг толилуулж байна.
www.URLAG.mn
