Монгол Улсын Ерөнхийлөгчийн сонгуулийн нэр дэвшигчдийн сурталчилгаа хаа сайгүй өрнөж байна. Сонгуулийн сурталчилгааны уур амьсгал ид өрнөж байгаа энэ үед фэйсбүүк, твиттер цахим мэдээллийн сувгуудаар МЗХ-ноос санаачилан өрнүүлж байгаа “Залуусаа, сонгуульдаа оролцъё” аяны Би саналаа өгнө постер, зураг болон видео шторкууд хүчтэй давалгаалж эхэлжээ. Тэд залуучуудаа саналаа өгөхөд уриалсан олон сонирхолтой постеруудыг бэлдэж, дэмжсэн залуусын зургийг нийтэлсэн байна.
Хэн нь сонгогдох бол гэсэн таамагтай зэрэгцээд ирц нь хүрэх болов уу, бидний татварын мөнгөөр дахиад сонгууль болох вий, хүмүүс хэр идэвхтэй оролцох бол гэдэг асуудал шүдний өвчин болоод байгаа нь нууц биш. Тиймээс МЗХ залуучуудаа саналаа өгч, сонгуульдаа идэвхитэй оролцоход уриалж энэхүү аяныг өрнүүлээд байгаа юм байна. Тэд аливаа нэг улс төрийн намын нэр дэвшигчдийг дэмжиж ажиллахгүй, зөвхөн нийт залуусаа идэвхтэй байж сонгуульдаа оролцож, ирээдүйнхээ, сонголтынхоо эзэн нь байгаасай гэж уриалж байгаа юм байна.
Би залуу иргэн саналаа өгнө,
Би мөрөөдөлтэй саналаа өгнө,
Би хайртай хүнтэй саналаа өгнө,
Би архаг твиттерчин саналаа өгнө,
Би жинхэнэ фэйсбүүкчин саналаа өгнө,
Залуусаа сонгуульдаа оролцъя зэргээр уриалсан постер, сурталчилгаа нь залуучуудад ихээхэн таалагдаж байгаа бололтой. Эдгээр зураг постеруудыг өөрийн фэйсбүүк хаягандаа шэйрлэж, твиттер хуудсандаа жиргэж залуучууд саналаа өгөхөө илэрхийлсээр байна. Ингээд цахим мэдээллийн сувагт давалгаалж байгаа постеруудаас зарим нэгийг бид нийтэлж байна.
www.URLAG.mn
