БНМАУ-ын Ардын жүжигчин, төрийн шагналт, Монголын хөгжмийн театрыг үндэслэгчдийн нэг, хөгжмийн зохиолч, удирдаач |
С.Гончигсумлаа 1915-2-18 нд Баянхонгор аймгийн Өлзийт суманд төрсөн. Мэдээлэл, радио, телевизийн улсын хорооны хөгжмийн ерөнхий зөвлөх байхдаа Монгол Улсын ардын жүжигчин /1971/. Урлагийн гавьяат зүтгэлтэн /1965/. Төрийн шагнал /1961/. 1928-1930 онд Баянзүрх уулын хошууны бага сургууль, 1930-1933 онд Улаанбаатарт Багшийн сургуульд, 1933-1950 онд Москвад П.И.Чайковскийн нэрэмжит хөгжмийн дээд сургуульд суралцаж төгсчээ. 1937-1939 онд Өмнөговь аймгийн Луус суманд малын бага эмч, 1939 онд Улаанбаатарт орчуулагч багш, 1940-1943 онд Улсын циркт хөгжимчин, 1950-1958 онд УХДТ-д удирдаач, 1958 оноос ХБДС-д уран сайхны удирдагч, 1960 оноос Монголын радио, телевизэд хөгжмийн ерөнхий зөвлөх, 1957 оноос МХөЗ-ын холбооны зохион байгуулах товчооны дарга, 1964-1983 онд МХөЗ-ын холбооны даргаар ажиллаж байжээ. "Нотонд суралцах бичиг" ном хэвлүүлж, олон арван дуу, романс, цөөхүүл хөгжим болон төгөлдөр хуурын томоохон бүтээлүүд, "Үнэн" дуурь, "Ганхуяг", "Хошуу наадам" зэрэг бүжгэн жүжиг, таван симфони, жүжиг, киноны хөгжим зэрэг олон бүтээл туурвиж, "Ганхуяг" бүжгэн жүжгийн хөгжмөөр Төрийн шагнал хүртсэн байна. Монголын хөгжмийн урлагийн нэр хүндийг дэлхийн тавцанд хүргэгчдийн нэг билээ. Тиймээс түүнийг Германы урлагийн академи сурвалжлагч гишүүнээрээ сонгожээ. Ардын Их Хурлын депутатаар сонгогдож байжээ. Сүхбаатарын одонгоор хоёр удаа, "Алтан гадас"одон, Хөдөлмөрийн хүндэт медаль, ойн медалиуд, мөн ЗХУ-ын /хуучин нэрээр/ Улс түмний найрамдлын одон, Болгар улсын Георгий Дмитровын хүндэт медалиар шагнагджээ. |
