Монгол түмнийг омогшуулж, тайзыг эзэгнэж чаддаг “Хар сарнай” хамтлагийн дуучин С.Амармандах “Дээлтэй Монгол” наадмын хаалтын дууг дуулсан. Энэ үеэр түүнтэй ярилцсанаа хүргэе.
-Зуныг хэрхэн өнгөрүүлж байна вэ?
-Саяхан гэр бүлийнхэнтэйгээ Хэнтий аймгийн Аварга тосон нуурын ойролцоо амраад ирсэн. Удахгүй Хөвсгөл явах төлөвлөгөөтэй байна.
-Сүүлийн үеийн уран бүтээлийнхээ сонин сайхнаас хуваалцахгүй юу?
-Х.Лхагвасүрэн ах, Т.Дэлгэрмөрөн бид гурвыг Япон, БНСУ-д ажиллаж, амьдарч байгаа монголчууд урьсан. Одоогоор явах эсэхээ шийдээгүй байна. Урьд жил хийсэн “Сэрүүн булгийн ус” дуугаа ардын жүжигчин Ш.Чимэдцэеэ эгчтэй хамтран шинэчилж байгаа. Мөн Төрийн шагналт Д.Сосорбарам ахтай хамтран “Их хаантай учирсан зүүд” хэмээх өвөг дээдсээ магтан дуулсан бүтээлдээ клип хийж байна. Уг клипээр зарим залуус их хаадын түүх шастираа мэдэхгүй байна гэсэн санааг илэрхийлсэн.
-Бие даасан тоглолтоо хэзээ хийх вэ?
-“Хар сарнай” хамтлаг ардын урлагийг орчин үеийнхтэй хослуулж дуулснаас хойш 17 жил өнгөрчээ. Энэ жилүүдэд хам тарч ажиллаж байсан хөөмийч, ардын бүжигчин, уртын дуучдыг оролцуулсан 17 жилийн ойн тоглолтоо ирэх өвөл хийхээр төлөвлөж байна.
“Алтан ураг” хамтлагтай гурван дуун дээр хамтарна. Мөн өвөөгийн 94, “Жалам хар”-ын 45, түүний нэрэмжит бүжгийн наадмын 11, “Сэвжид” сангийн таван жилийн ой энэ жил тохиож байгаа учир цагаан сараас өмнө тоглолт хийнэ.
Өвөөтэй хамтарч ажиллаж байсан бүх ахмад уран бүтээлчийг урьж, дэглэсэн бүжгүүдээс нь толилуулна.
Б.Дөл
