"Лардьма" киногоороо олны таашаал хүртэж яваа эмэгтэй бол жүжигчин Б.Навчаа. Тэрбээр ихэвчлэн хурц ааштай, шийдэмгий бүсгүйчүүдийн дүрийг чадварлаг гаргадаг нэгэн.
Жүжигчин Б.Навчаа тун удахгүй хайрын тухай гэгээлэг кино бүтээх гэнэ. Шинэ киноныхоо бэлтгэл ажлыг базаасан тэрбээр кино багийнхны хамт ирэх сараас ажилдаа шамдан орох ажээ. Онцлог нь бодит амьдралаас сэдэвлэсэн кино байх юм.Монголын кино ертөнцөд үнэтэй хувь нэмэр оруулж яваа тэрбээр энэ удаад гэгээн хайрын тухай, тэр тусмаа цаг хугацааны зөрүүтэй, хайр дурлалын гэгээлэг сэдэв сонгож авсан гэнэ.
Сонирхуулахад Монголын жүжигчдээс үзэгчдэд тоглосон дүрээрээ нэрлэгдсэн жүжигчин тун цөөхөн байдаг. Галзуу Бумаа, Итгэлт баян, “Гарын таван хуруу”-ны Шагдар “Говийн зэрэглээ”-ийн Арслан, Хасар Жагаа, Гажиг Гармаа, Исмэл, Далайцэрэн гэхчилэн аав ээжээс заяасан нэрээрээ биш тоглосон дүрээрээ нэрлэгдсэн жүжигчид бий. Тэгвэл жүжигчин Б.Навчаа яг л тэдэн шиг тоглосон дүрээрээ нэрлүүлэхийг хүсдэг гэнэ. Авъяаслаг, хөдөлмөрч хэмээгдэн олны хайр хүндэтгэлийг хүлээж яваа жүжигчин бүсгүйн хүсэл тун удахгүй биелэх биз ээ
www.URLAG.mn
