Шинэ мянганы босгон дээгүүр өөрийн дуулах авьяас чадвараараа дүүлж гарч ирсэн хүн бол яах аргагүй УГЖ С.Жавхлан. Өөрийнхөө авьяас чадвараар амьдарч явсан дуучин залуу маань гэнэт улстөрд хөл тавьж, хий хоосон улстөржих болсон нь олныг гайхахад хүргэсэн. Тэрээр ид дуулж ахуй цагтаа багагүй мөнгө олж, Монголын хөрөнгөлөг залуусын эгнээнд зүй ёсоор багтаж байв.
Гэтэл энэ залууг юуны учир их улстөр татах болсон нь цаанаа ихээхэн учир шалтгаантай. Олонхийн ярьж байгаагаар бол “С.Жавхлан эх оронч үзэлтэй хүн учраас өөрийн эрхгүй улстөрд орлоо. Эх орон ард түмнээ гэсэн чин сэтгэл л түүнийг улстөрд хөл тавихад хүргэсэн” хэмээдэг. Гэтэл нөгөө нэг хэсэг нь “С.Жавхлан их мөнгөтэй болсон учраас улстөрөөр оролдохоор шийдсэн” гэх зэрэг таамаг дэвшүүлдэг. Гэтэл энэ бүгдийн аль аль нь биш бололтой. Түүний ойрын тойрон хүрээлэгчдийн хэлснээр бол тэс өөр бөгөөд ийн ярьсан юм.
Юутай ч тэр эх орон, ард түмнийхээ төлөө биш гэдэг нь эндээс харагдана. “С.Жавхлан сайн дуучин, мөнгө олдог хэдий ч түүнийгээ голох болсон. Улстөрчидтэй хэдэн сонгуульд шоудаад ямар амархан мөнгө олж болдгийг мэдэрсэн хүн. Тийм учраас амархан мөнгө олох гэж улстөрд орж байгаа юм. Өөрөө надад нэг удаа хэлж байсан. Тэр ингэж 21 аймгаар зүдэрч тойроод 20 сая төгрөг олох гэж зовж байхаар ганцхан гарын үсэг зураад хэдэн саяар нь халаасалдаг газар л очье. Энэ улстөрд орчих юм бол их л амархан харагдаж байна шүү. Дуулж мөнгө олох гэж зовж байхаар ганцхан гарын үсгээр л мөнгө олдог больё. Би ганцхан гарын үсгээр мөнгө олдог дарга болно” хэмээн халамцуухан хэлж байсныг уламжлав.
Болохгүй юм алга. Их улстөрд нэг орчихсон байхад гарын үсгээр мөнгө олох ч наад захын асуудал байх. Гагцхүү тэр талбарт хөлөө тавина гэдэг тийм ч амаргүйг өөрийнх нь өнгөрүүлсэн улстөрийн амьдрал хэлж өгсөн. Тэрээр анх 2009 онд Чингэлтэй дүүрэгт нөхөн сонгуульд өрсөлдөж, 2600-хан хүний санал авч, өвдөг шороодсон. Үүний дараа ТББ байгуулаад уйгагүй улстөржиж байж өнгөрөгч 2012 оны сонгуульд төрж өссөн нутаг Увсаас нэрээ дэвшүүлсэн ч увсчууд С.Жавхланд итгэл үзүүлээгүй. Хэзээ ч үзүүлэхгүй гэдгээ ч хэлсэн гэдэг.
Харин одоо тэрээр хадмынхаа нутаг Архангай аймагт нэр нүүр олохыг хичээж яваа нь цаанаа нэгийг өгүүлнэ. Хадмын нутагт удаа дараа үнэ төлбөргүй тоглолт хийж, зав л гарвал Архангайг зорих болсон нь 2016 оныг баримжаалсан аялал гэдгийг эх сурвалж хэлдэг. Хамгийн гол нь нутагтаа өвдөг шорооддог нөхөрт хатуу сонголттой гэх архангайчууд санал өгөх эсэх нь тун ч эргэлзээтэй. Гэсэн хэдий ч дуучин залуугийн “ганцхан гарын үсгээр мөнгө олох” гэсэн чин хүсэл тийм ч амар мохохгүй бололтой юм.
Б.Өлзийт
