Төрийн шагналт зохиолч, академич Ш.Нацагдоржийн “Мандхай цэцэн” роман 32 жилийн дараа дахин хэвлэгдлээ. 1981 онд анх хэвлэгдэхдээ уншигчдыг хошууруулж байсан энэ роман 1987 онд “Мандхай цэцэн” хэмээх дөрвөн бүлэгт уран сайхны кино болон дэлгэцнээ амилсан билээ.
Зохиолчийн охин түүхийн ухааны доктор Н.Ариунгуагийн дурссанаар академич Ш.Нацагдорж анх 1977 онд кино зохиол бичсэн ч МАХН-н Төв хорооноос Мандхай хатны тухай түүхэн уран сайхны киноны ажлыг зогсоох шийдвэр гарснаар роман болгон бичсэн түүхтэй ажээ. Монголын төр, алтан ургийг угсааг таслахгүйн төлөө хуйг нөмөрч, хурцыг барьж, аргамаг агтны нуруун дээр исгэрэх сум, илд жадны дундуур шурган явсан эрэлхэг хатны түүхийг дэлгэцнээ амилуулах гэж тэрээр арав гаруй жил цуцалтгүй хөөцөлдсөнөөр монгол түмний үзэх дуртай мөнхийн бүтээл болсон “Мандхай цэцэн” кино бүтсэн түүхтэй ажээ. “Эдмон” компанид хэвлэгдсэн “Мандхай цэцэн” романд зохиогчийн охин түүхийн ухааны доктор Н.Ариунгуа өмнөтгөл бичиж, хавтасны чимэглэл зургийг зураач МУСТА Жамбаажамцын Цог зуржээ. Сонирхуулахад, “Үхэж үл болно Чингис хаан”, “Аравт”, “Долоон бурхан харвадаггүй”, “Ану хатан” зэрэг сүүлийн үеийн бүх томоохон түүхэн кинонд ерөнхий зураачаар ажилласан зураач Ж.Цог “Мандхай цэцэн” түүхэн кинонд ажиллахдаа зохиолчтой олон удаа уулзаж зөвлөгөө авч байсан аж.
Төрийн хошой шагналт, академич Ш.Нацагдорж уран зохиолын “Болор толь”, “Ононгийн цалгиа”, “Сувд эрдэнэ” зэрэг олон сайхан бүтээл бичиж туурвиснаас гадна Дамбийжаагийн тухай “Ичээнд нь” уран сайхны кино зохиолыг бичжээ.
www.URLAG.mn
