"B Production", "Боловсрол" суваг телевиз, “Камертон” хамтлаг хамтран үзэгчид, хөгжим сонирхогчдыг байлдан дагуулах, урт хугацаанд мэргэжлийн төвшинд оршин тогтнох авъяас чадвар, эрч хүч, эв нэгдлээр дүүрэн цоо шинэ хөвгүүдийн хамтлаг байгуулах зорилгоор "Камертон-2" шоу төслийг санаачлан амжилттай хэрэгжүүлсэн билээ. Уг шоунд оролцсон 760 гаруй залуугаас шалгарсан дөрвөн залуу өнөөдөр “Камертон” хамтлагийн ахлагч, продюсер, дуучин Д.Болдтой хамтран анхны бие даасан цомгийн ажилдаа ороод байгаа юм. Тэд хэдхэн хоногийн өмнө Сингапураас эх орондоо иржээ. Тиймээс тэдэнтэй уулзан уран бүтээлийн сонин сайхнаас нь хуваалцлаа.
-Сингапурт ямар ажил амжуулаад ирэв ээ?
-Бид хоёр сарын хугацаатайгаар Сингапур улсыг зориод ирлээ. Тэнд байх хугацаандаа анхны бие даасан цомгийнхоо бичлэгийн ажлыг 70-80 хувьтай хийсэн.
-Хамтлагтаа нэр өгөхөөр сонгосон гэсэн шүү дээ. Хэзээ нийтэд зарлах вэ?
-Хамтлагтаа гоё утга агуулсан монгол нэр өгсөн. Шинэ уран бүтээлээ дэлгэх үедээ хамтлагийнхаа нэрийг албан ёсоор зарлана даа. Бид хүсэл мөрөөдлийнхөө дагуу уран бүтээлээ хийгээд явж байгаадаа маш их баяртай байдаг. Тун удахгүй шинэ цомогтойгоо та бүхэнтэй уулзах болно.
-Хэзээ уулзах вэ?
-Есдүгээр сарын сүүлчээр манай хамтлагийн эхний уран бүтээлүүд клипийн хамт үзэгчдийн хүртээл болно. Харин анхны цомог ирэх аравдугаар сарын сүүлчээр л бэлэн болох байх. Арваннэгдүгээр сард тоглолт хийх төлөвлөгөөтэй байгаа.
-Ямар уран бүтээлчидтэй хамтран ажиллав?
-Манай хамтлагийн продюсер Болдоо ах ихэнх дуунуудыг маань хийж байгаа. Өөрсдөө бас ярилцаж байгаад R&B, pop, soul R&B урсгалын дуунууд хийж байна.
-Анхны цомог хэдэн дуутай байх бол?
-Арав гаруй дуутай байхаар төлөвлөсөн.
Г.Даша
