Грэммигийн шагналт дуучин Эми Вайнхауз амьд сэрүүн байсан бол энэ сарын 14-нд 30 нас хүрэх байжээ. Дуучны эцэг эх охиныхоо дурсгалд зориулан, төрсөн өдрийг нь угтаж түүний фото зургуудаар үзэсгэлэн гаргасан байна.
Дуучин бүсгүйн эцэг эх болон Женис, Митч Вайнхаус нар охиныхоо фото зургийн үзэсгэлэн гаргаснаар, олсон ашиг орлогыг Эми Вайнхаузын буяны санд хандивлах юм байна. Митч Вайнхаусын хэлж байгаагаар охиных нь талаарх хүмүүсийн бодол өнгөрсөн хугацаанд өөрчлөгджээ. Амьд сэрүүн байхад нь архинд донтсон зэргээр захын сонинд хүртэл бичдэг байсан бол, одоо харин түүнийг хайрладаг хүмүүс олон болж, охиныг нь сайн чадвартай дуучин байснаар хүлээн авдаг болжээ. Энэ нь мэдээж надад бахархалтай санагдаж байна. Хүмүүсийн энэ хандлагыг би мэдэрснээр, охиноо алдсан эцэг хүний хувьд сэтгэл минь бага ч болов уужирч байна гэж Митч Вайнхауз хэллээ. Эми Вайнхаузын төрж өссөн энэ л Камден хотод олон шүтэн бишрэгч нь хүрэлцэн ирдэг байна. Дуучин бүсгүйн "Рехаб" дуу анх түүнд нэр алдрыг авчирсан юм. "Рехаб" дуу цацагдсан даруй л Америкийн Билбоардын чартын шилдэг аравт багтаж, удаан хугацаанд чартын эхний мөрүүдэд бичигдэж байсан. Тэрээр амьд сэрүүн байхдаа хэдий "Франк" болон "Бэк тү Блэк" гээд хоёр цомог л гаргасан ч, Грэммигийн наадмаас нийт 6 шагнал хүртэж байсан юм. Эми Вайнхаузын эцэг эх охиноо алдсаны дараа түүний нэрээр тусгай сан байгуулж, улмаар хар тамхи мансуурулах бодис, архи согтууруулах ундаанд донтсон залуучуудад тусламж үзүүлж, тэднийг муу зуршлаас нь ангижруулж, нийгэмшүүлэх ажлыг зохион байгуулдаг юм. Мөн ядуу зүдүүст, нийгмийн эмзэг давхаргынханд ч тусламжийн гараа сунгадаг байна.
-
-
-
М.Даваадулам
