Монгол Улсын Хөдөлмөрийн баатар, Ардын уран зохиолч, Төрийн шагналт яруу найрагч Дэндэвийн Пүрэвдоржийн мэндэлсний 80 жилийн ойд зориулсан “Дөрвөн цагийн тал” хүндэтгэлийн цэнгүүн энэ сарын 27-нд буюу өнөөдөр Соёлын төв өргөөнд болно.Түүний гэр бүл, шавь нарынх нь зүгээс ойд зориулан олон кампанит ажил зохион байгуулж буйн нэг нь уран бүтээлийнх нь дээж болох “Гал, зүрх хоёр” СD хэвлүүлсэн байна. СD-ний баярыг тоглолттой нь хамтатган тэмдэглэж, зочдод бэлэглэх гэнэ.
Түүний бичсэн “Алтан намар”, “Алтан шар зам”, “Хөдөө нутаг сайхан”, “Дөрвөн цагийн тал”, “Хаврын шөнийн бодол”, “Орчлонд би азтай төржээ”, “Сайн нөхрийн ерөөл”, “Урьд шөнө чи зүүдлэв үү”, “Таксийн цоохор машин”, “Чи минь битгий мартаарай” зэрэг олон шүлэгт нь хөгжмийн зохиолчид ая оруулж, нийтийн хүртээл болгосноос хойш одоо хэр нь дуулсаар ирсэн. Эдгээр сайхан дуунууд тоглолтын үдэш эшиглэж, үе үеийн “Болор цом”-ын эзэд яруу найргаа унших аж. Д.Пүрэвдорж агсан эх орныхоо дуурийн урлагийг хөгжүүлэхэд авьяас билгийн хишгээ хайрлаж, “Шивээ хиагт”, “Нүцгэн ноён”, “Хархорин” дуурийн цомнол бүтээсэн байдаг. Түүнчлэн “Тарчилсан сүнс” “Улаан зүүд”, “Нарны жавар” гурамсан роман туурвиж “Улаан гэрийн хоригдол”, “Бор гэрийн богд” дурсамжийн ном хэвлүүлсэн манай уран зохиолын яндашгүй авьяас билигтэн байлаа. “Шивээ хиагт” дуурь нь ДБЭТ-т тавигдсанаар тайзны бүтээлийн уран сайхныг баяжуулсан үндэсний дуурь билээ.
Тэрбээр уран зохиолыг түгээн сурталчилж, ард түмний хүртээл болгоход бүхий л авьяас билиг, эрч хүч, ухаан бодлоо харамгүй зориулж “Монголын нэг өдөр”, “Уран үгсийн чуулган”-ыг хамтран бүтээлцэж, “Болор цом” яруу найргийн наадмын галыг асааж, тооныг өргөсөн нэгэн юм.
www.URLAG.mn
