Музейн чиглэлээр үндэсний сургагч бэлдэх цуврал дөрвөн сургалтын хаалт болно.
Японы Итгэлцлийн сангийн санхүүжилтээр хэрэгжиж буй “Музейн тогтвортой хөгжлийн чадавхийг дээшлүүлэх нь” ЮНЕСКО-гийн төслийн хүрээнд үндэсний сургагч бэлдэх цуврал 4 сургалтын төгсгөлийн “Музейн үзүүллэг ба цуглуулгын хадгалалт” сургалт энэ сарын 14-17-нд болно. Сургалтын нээлтийн ажиллагаа 10 дугаар сарын 14-ний 09.30 цагт, цуврал 4 сургалтад хамрагдагсдад “Үндэсний сургагч”-ийн гэрчилгээ гардуулах ёслол 10 дугаар сарын 17-ны 18.00 цагт тус тус Монголын Үндэсний Музейд зохион байгуулагдана.
ССАЖЯ, ЮНЕСКО-гийн Монголын Үндэсний Комисс болон Монголын Үндэсний Музей хамтран зохион байгуулж буй үндэсний сургагч бэлдэх төгсгөлийн сургалтыг АНУ-ын Техас мужийн Люббок хотын Техникийн Их сургуулийн Музейн шинжлэх ухааны хөтөлбөр, Олон нийттэй харилцах холбооны дэд захирал Ники Ладкин удирдан явуулна.
Уг сургалтаар музейн гол цөм үзмэр цуглуулгын хадгалалт хамгаалалтыг сайжруулах, үзүүллэгийн танхимд үзмэрийг аюулгүй, үзэгчдийн хэрэгцээ шаардлагыг хангахуйц байдлаар дэлгэн үзүүлэх гол асуудлуудыг олон улсын музейнүүд ямар түвшинд хэрхэн шийдэж байгаа болон техник технологийн дэвшлийг хэрхэн ашиглаж буй зэрэг мэдлэг, мэдээллийг оролцогчдод хүргэхээс гадна дадлага ажлууд хийгдэнэ.Цуврал сургалтыг дүүргэсэн мэргэжилтнүүд энэ ондоо багтан 21 аймгийг бүсчлэн хувааж хөдөө орон нутагт сургалт явуулна. Эхний сургалтад баруун 5 аймгийн музейн ажилтнуудыг хамруулах бөгөөд Ховд аймгийн төвд зохион байгуулагдах аж.
www.URLAG.mn
