Г.Эрдэнэтуяа /“Өнөөдөр” сонины гэрэл зургийн албаны дарга/, С.Бадамханд /“Моннип фото” компанийн дэд захирал, гэрэл зурагчин/ нарын хамтарсан “ЕРТӨНЦИЙН ӨНГӨ” гэрэл зургийн үзэсгэлэн Blue moon арт галерейн үзэсгэлэнгийн танхимд дэлгэгдэж уран бүтээлээ үзэгчдэд толилуулах гэж байна.
Уран бүтээлч бүсгүйчүүд 2011 онд “Таван өнгө”, 2012 онд “Амьдралын өнгө” гэрэл зургийн бүтээлийн үзэсгэлэнгээ гаргаж байсан юм.
Уг үзэсгэлэнд эмэгтэй хүний торгон мэдрэмжээр ертөнцийн өнгийг тольдсон 60 гаруй бүтээл дэлгэгдсэн байна. Үзэсгэлэнгийн онцлог нь орчин үеийн техникийн дэвшлээр бус, хар цагаан хальснаас зургийг хэрхэн буулгадаг байсныг харуулсан ба бүтээлүүдийг цаасан дээр бус, модон дээр хэвлэсэн юм. Гэрэл зургийг ийнхүү модон дээр буулгахыг “Болор зураг” хэмээдэг аж.
Энэхүү үзэсгэлэнгийн ерөнхий ивээн тэтгэгчээр Ч.Ганбат захиралтай “Photo picture” хэвлэх үйлдвэр ажиллаж байгаа юм. Уран бүтээлч бүсгүйчүүддээ цаашдийн уран бүтээлд нь өндрөөс өндөр амжилт хүсье. Урлагийн тэнгэр Янжинлхам бурхан ивээх болтугай.
Уг үзэсгэлэн 2013 оны 11-р сарын 01-04 хооронд “Blue moon” арт галерейн үзэсгэлэнгийн танхимд дэлгэгдэх бөгөөд дэлгэрэнгүй мэдээллийг 88078028, 99122338, 89806021 дугаарын утсаар лавлана уу.
www.URLAG.mn
