Best of Erdenetungalag тоглолт үзэгч таны мэлмийд хүрэхэд 3 хоног үлдлээ. Тэрээр 2003 онд анх урлагийн ертөнцөд хөл тавьснаас хойш өдгөө 10 жил өнгөрчээ. Түүний анхны уран бүтээлүүдийн нэг болох, дуучин Т.Батсайхантай хамтран дуулсан “Ханьсахын жаргал” дуу нь ч өдгөө 10 настай, үзэгчдийн дуулах, сонсох дуртай дууны нэг байсаар байна.
Тоглолтын уур амьсгалын тухайд, Г.Эрдэнэтунгалаг хорь гаруйхан настайдаа урлагийн тайзнаа анх гарч ирж байсан шигээ үзэгч олны сэтгэлд хоногшсон “Хайрлаарай”, “Дуулж л явахаас даа”, “Зангаараа амраг”, “Ханьсахын жаргал”, “Ижий минь бодогдоно”, “Нарт тэнгэрийн дор” зэрэг өөрийн нэрийн хуудас болсон танил дотно дуунуудаа дуулах гэнэ. Мөн урилгаар “Хар сарнай” хамтлагийн дуучин С.Амармандах, дуучин Л.Чулуунбаатар, Т.Батсайхан, “Voice” группийн дуучин А.Эрдэнэжаргал, ятгачин Ч.Мөнх-Эрдэнэ, саксфончин Ч.Болдбаатар, Улсын Филармонийн симфони оркестр оролцоно. Дуучин Г.Эрдэнэтунгалаг нь СУИС-ийн Дуурийн дуулаачийн ангийг төгссөн учраас мэргэжлийн хэд хэдэн дуугаар үзэгчдийн сонорыг мялаахын зэрэгцээ Улсын хурц арслан Д.Мөнх-эрдэнэ хүрэлцэн ирж ая дуу өргөх ажээ. Тоглолтын тасалбарыг www.monda.mn сайтаар худалдаалж байгаа ба үзэгч та хүссэн суудлаа сонгож захиалах боломжтой, мөн UB palace-ын билетийн кассаар шууд худалдаалагдаж, 1109 үнэгүй хүргэж өгнө.
BEST of ERDENETUNGALAG хэмээх тоглолтын нэрээс харахад ч дуучин Г.Эрдэнэтунгалаг шилдэг бүхнээ 12-р сарын 1-ний өдөр үзүүлэх бололтой.
www.URLAG.mn
