“Кармен” дахин төрөх гэж байна Хамгийн олон үзэгчтэй, хэзээд эрэлттэй байдаг уг дуурийг театр шинэчлэн найруулж буй бөгөөд энэ сарын 14,15-нд нээлтээ хийх талаар өнөөдөр хэвлэлийн хурал хийлээ.
Тэртээ 1984 онд найруулагч Л.Эрдэнэбулганы хүсэл зоригоор анхлан үзэгчдэд хүргэснээс хойш энэ жилийг хүртэл юуг нь ч өөрчлөөгүйн зэрэгцээ тэр л үеийн тайз, хувцас хэрэглэлтэйгээр дахин дахин тоглосоор ирсэн байна. Хэдий сонгодог бүтээл хуучны янзаараа байх нь үнэ цэнэтэй гэх авч тавилт, тайз өнөө янзаараа байхын зэрэгцээ хувцас, жижиг хэрэгсэл элэгдэж хуучирсан нь жүжиг бүхэлдээ муу болсон мэт харагдаж байв. Энэ талаар хөгжим судлаачид шүүмж өрнүүлжээ. Театрын захиргаа дүгнэлт хийж, шинээр тавихад шаардагдах төсөв хөрөнгө олгох хүсэлтийг ССАЖЯ-нд тавьснаар ийнхүү “Кармен” шинэчлэгдэж байгаа аж. Найруулагч нь удирдаач, Урлагийн гавьяат зүтгэлтэн Ж.Бүрэнбэх.
Тэрбээр уг бүтээлийг анхнаас нь удирдан тоглуулж ирсний хувьд ширхэг деталь болгоны учрыг ч олох мэргэжилтэн хэмээн түүнд алдарт бүтээлээр “оролдох” эрхийг олгожээ. Ерөнхий зураач нь театрын ерөнхий зураач Г.Ганбаатар гэнэ. Сонирхолтой нь, түүний аав Ардын зураач Ч.Гунгаасүх 1984 онд уг бүтээлийг тайзнаа тавихад зураачаар нь ажилласан аж. Харин эдүгээ хүү нь аавынхаа тайзны шийдлийг бүхий л талаар өөрчилж, өөрийн гэсэн “Кармен”-ийг бүтээж байна. Өдгөө театрын тайзнаа өндөр гэгчийн угсармал хана цайз босгоод байгаа юм. Эргэдэг тайзыг дөрвөн хэсэгт хувааж үзэгдэл бүрийн өнгийг илтгэсэн зураг, тоноглол байршуулжээ. Жүжгийн сургуулилт өдөр бүр, заримдаа өдөрт хоёр удаа явагдаж байгаа юм. Францын нэрт хөгжмийн зохиолч, франц үндэстнийг дэлхийд алдаршуулахад түүхэн гавьяа байгуулсан Ж.Бизегийн алдарт “Кармен” Монголын Дуурийн театрын тайзнаа дахин амилах гэж байна.
www.URLAG.mn
