СУИС-ийг Урлагийн гавьяат зүтгэлтэн, жүжигчин Б.Отгонбатын удирдлагад төгссөн залуу жүжигчин Ч.Сэлэнгэ оюутан ахуйгаасаа дэлгэцийн уран бүтээлүүдэд чадварлаг тоглож үзэгчдэд танигдсан. Тухайлбал, “18 нас: Би чамд хайртай”, “Аз жаргал”, “Хайр”, “Бумеранг”, “Girls” цуврал гэхчилэн түүний тоглосон уран бүтээлүүдийг нэрлэж болно. Түүнчлэн УДЭТ-ын бүтээл, У.Шекспирийн “Ромео, Жульетта” жүжгийн Жульеттад ч тоглоод амжсан. Ихэвчлэн драм төрлийн кинонд гэнэн цайлган, романтик бүсгүйн дүрүүдэд тоглож гараагаа эхэлсэн тэрбээр сүүлийн жилүүдэд өөр өөр төрлийн уран бүтээлүүдэд тоглон өөрийгөө сорьж буй. Тодруулбал, найруулагч Б.Чингүүний АНУ-д бүтээсэн “Six feet” адал явдалт төрлийн кино, найруулагч Б.Баатарын “Этгээд” триллер төрлийн кинонд тоглосон юм. Өнгөрсөн онд гэхэд л жүжигчин Ч.Сэлэнгэ “UBS” телевизийн ээлжит бүтээл болох Буриад ястны тухай “Хайрын домог” түүхэн уран сайхны киноны гол дүрд, “Nomadia” пикчерсийн “366 дахь өдөр” драм төрлийн киноны гол дүрд, мөн “Nomadia” пикчерс, “Huuk” фильмийн хамтын бүтээл “Хоёр шөнө” инээдмийн уран сайхны киноны гол дүрд тоглосон юм. Түүнчлэн “Dark secret” аймшгийн төрлийн киноны зохиолыг бичиж, найруулагчийн багт багтаж ажиллажээ. Харин тэрбээр яг одоо үзэгчидтэй “Mongol stunt team”-ийн “В1 давхар” адал явдалт, тулаант төрлийн киногоор уулзаж байна.
