Гялалзсан гэрэл, сэтгэл догдлуулсан хөгжмийн хэмнэл, үзэгчдийн алга ташилт. Энэ бол “Ододтой бүжиглэе” шоуны тайз. “Монгол” телевизийн бэлтгэн хүргэдэг эл шоунд оролцож, үзэгчидтэй эрэмгий бас энхрийхэн төрхөөр “уулзаж” буй оролцогч бол Н.Энхмаа.
Гурван хүүхдийн ээж болсон ч гуалиг бие, үзэсгэлэнт төрхөөрөө гялалзаж буй Н.Энхмаа “Ододтой бүжиглэе” шоуны дугаар бүрт авьяас, ур чадвараа харуулсаар байна.
2013 онд Монгол дахь “Playboy” сэтгүүлийн нүүрийг чимж, тус сэтгүүлийн энэхүү дугаар нь тухайн үеийн хамгийн их борлуулалттай сэтгүүлээр шалгарч байв. Мөн Н.Энхмаа 2014 онд шилдэг “Playmate”-ээр шалгарч байлаа.
Багаасаа мотоцикл унахыг хүсдэг байсан Н.Энхмаа 2023 онд “Egshu Mongolia” мото клубыг найзуудтайгаа нийлэн байгуулжээ. Эмэгтэй моточдоос бүрдсэн тус клуб зөвхөн мотоцикл унаад зогсохгүй, хүүхэд эмэгтэйчүүдэд чиглэсэн нийгмийн үйл ажиллагаа явуулдаг байна.
