Ардын жүжигчин, дуучин А.Долгор энэ сарын 8-нд “Зүйрлэшгүй сайхан” нэртэй уран бүтээлийн тайлан тоглолтоо хийх гэж байна. Төв аймгийн Хөгжимт драмын театрт анх 1973 онд дуулж эхэлснээс хойш уран бүтээлээ тасралтгүй туурвисаар ирсэн тэрбээр өнгөрсөн намар урлагт зүтгэсэн 40 жилийн ойд зориулсан эгшиглэнт он жилүүдийнхээ тайлан тоглолтыг цөөхөн үзэгчдийн хүрээнд өнгөрсөн намар даруухан тэмдэглэсэн.
Харин жил бүр эмэгтэйчүүдийн баяраар хийдэг тайлан тоглолт нь түүний хувьд олон түмэнтэйгээ уран бүтээлээрээ учран золгодог болзоот уулзалт юм.
Эмэгтэйчүүдийн баярт зориулсан концертдоо эх, үрийн элбэрэл хайр, эх орны сэдэвтэй дуунуудаа дуулах гэнэ. Энэ удаагийн тоглолтод Төв аймгаас төрсөн ардын жүжигчний нутгийн ардын уран зохиолчид болох Ш.Сүрэнжав, П.Бадарч, Б.Лхагвасүрэн, Ш.Дулмаа нар найраг шүлгийн дээжээсээ сорчлон хүргэж, нутгийн дуучныхаа тоглолтод ирсэн зочдын сонорыг уран үгсээр мялаахаар төлөвлөжээ.
Мөн гавьяат жүжигчин, дуучин Б.Сарантуяатай хамтарсан “Эх дэлхий бидний ээж”, ДБЭТ-ын дуучин Ариунбаатартай “Эх дэлхий бидний ээж”, дуучин Т.Дэлгэрмөрөнтэй “Сэтгэлд мөнхөрсөн ээж” зэрэг дуугаа хүргэх юм байна.
