Манай улсад “Ф.Шопены ба 21-р зууны Монгол” олон улсын төгөлдөр хуурчдын II уралдаан энэ сарын 23-28-ны өдрүүдэд амжилттай зохион байгуулагдаж өнгөрлөө. Уг уралдаан Азид өмнө нь болж байгаагүй бөгөөд манай улсад анх удаа зохион байгуулагдаж буйгаараа онцлог юм.
Уралдааны шүүгчээр Варшав хотын Ф.Шопены нэрэмжит хөгжмийн академийн багш, нэрт төгөлдөр хуурч Эва Побловцки, Шанхай хотын Хөгжмийн Консерваторын орлогч захирал, нэрт төгөлдөр хуурч Зие Танг, Эрхүү хотын Ф.Шопены нэрэмжит хөгжмийн коллежийн захирал, төгөлдөр хуурч Анастасия Сергеевна Дурбажева нар ажилласан юм.
Уг олон улсын уралдааныг Боловсрол, соёл, шинжлэх ухааны яам “А” ангилалын ялагчийг Польшийн Варшав хотын Ф.Шопены нэрэмжит хөгжмийн академид суралцуулахаар болсон бол Соёл, спорт, аялал жуулчлалын яам 35 сая төгрөгөөр ивээн тэтгэжээ.
“Ф.Шопены ба 21-р зууны Монгол” олон улсын төгөлдөр хуурчдын II уралдааны шилдгүүд тодорч тэмцээний 17 хүртэлх насны ангилалд Э.Номин тэргүүн байр эзэлж Польшийн Хөгжмийн их сургуульд суралцах эрхээр шагнагдсан бол хоёрдугаарт Ү.Уртнасан, гуравдугаар байрт Э.Ундрал, Г.Болормаа нар орсон байна. Харин 17-оос дээш насны ангилалд нэгдүгээр байрыг БНХАУ-аас ирж оролцсон Зү Ванг түрүүлж таван мянган ам доллараар шагнуулсан юм. Тус ангиллын хоёрдугаар байрт Б.Номингуа, тусгай байранд С.Номин, Б.Оюунгэрэл нар оржээ.
www.URLAG.mn