“Орфей” театр дүрийн сонгон шалгаруулалт зарлалаа. Тодруулбал, тус театрын уран бүтээлчид зохиолч Б.Шүүдэрцэцэгийн “Хагацашгүй” романаас сэдэвлэсэн ижил нэрт жүжгийг толилуулахаар болжээ. Тус уран бүтээлийн гол дүр болох Сүнжидмаа (эмэгтэй, нас 22-28), Чулуун (эрэгтэй, нас 25-30) дүрд жүжигчдийг сонгон шалгаруулах аж. Сонгон шалгаруулалт тавдугаар сарын 22-нд Тусгаар тогтголын ордонд болно.
Сонирхуулахад, 1937 оны хэлмэгдлийн үед үйл явдал нь өрнөх “Хагацашгүй” романд монгол бүсгүйн үнэнч хайрын тухай өгүүлсэн агаад бодит хүний намтраас сэдэвлэн бичжээ. Зохиолч Б.Шүүдэрцэцэгийг 1990-ээд оны эхээр Эрхүү хотод сурч байхад ангийнх нь нэгэн орос охины эмээ нь хэлмэгдсэн нөхрөө хайж очоод тэндээ үлдэж орос хүнтэй гэрлэсэн монгол эмэгтэй гэдгийг сонссоноо роман болгон бичсэн нь энэ аж. “Амраг хосуудыг хагацуулж, алаг үрсийг өнчрүүлж, айл гэрийг нулимсан далайд живүүлсэн аюулт хэлмэгдлийн хядлага эхлэхээс хоёр жилийн өмнө, хөхөгчин гахай жилийн зуны тэргүүн сарын тэр нэгэн бүрхэг өдөр сэтгэлд минь тодхон байна…” гэж гол баатар Сүнжидмаагийн дурсамжаар зохиол эхэлдэг.
Ташрамд дурдахад, “Орфей” театрын таван жилийн ой энэ онд тохиож буй бөгөд тус театрынхан өнгөрсөн хугацаанд Германы суут зохиолч И.В.Гётегийн насан туршдаа бичсэн зохиол гэгддэг “Фауст” зохиолоос сэдэвлэсэн “Фауст” постдрамын жүжгийг, Оросын нэрт зохиолч Ф.М.Достоевскийн “Гэм зэм” романаас сэдэвлэсэн ижил нэрт “Гэм зэм” постдрамын жүжгийг, “Broadway” театрын алдарт бүтээл, АНУ-ын зохиолч Жон Патрикийн “Everybody loves Opal” жүжгийг “Опал” нэртэйгээр болон саркастик мелодрам төрлөөр, Английн алдарт зохиолч Жорж Оруэллийн “1984” романаас сэдэвлэсэн “1984” постдрамын жүжгийг, Хятадын зохиолч Үй Хуагийн “Амьдрахуй” туужаас сэдэвлэсэн “Амьдрахуй” драмын жүжгийг театрын урлагт дурлагсдад толилуулж байв.
