Улсын Драмын Эрдмийн Театрын жүжигчин, МУСТА Ц.Баясгалангийн шинэ уран бүтээл: ТЭНГЭРИЙН АЯЛГУУ хэмээх бүүвэйн дууны домог моно мюзыкл драм
Сүүлийн үед драмын урлагийн төрөлд жүжигчний ур чадварыг сорьсон, нүүдлийн тайзтай, уран бүтээлийн үйлдвэрлэлийн хямд төсөр зардлаар бүтэх, олон талын ач холбогдол өндөр, үзэгчдийн таашаалд нийцүүлсэн нэгэн төрөл бол “НЭГ ХҮНИЙ ДРАМЫН ЖҮЖИГ буюу МОНО ДРАМ” бөгөөд үүний нэг жишээ нь Улсын Драмын Эрдмийн Театрын жүжигчин Ц.Баясгалан өөрийн авъяас чадварыг сорьж, Францын алдарт дуучин Эдит Пиафын амьдрал, уран бүтээлээс сэдэвлэн “Би Эдип Пиаф байна” моно музыкл драмын жүжгээ үзэгч олондоо толилуулсан юм. Тэрээр алдарт дуучны 7 дууг франц хэл дээр дуулж, мөн жүжиглэж, 1 цаг 10 минутын турш үзэгчдийн сэтгэл зүрхэнд хүрч тоглож, үзэгчдийн таашаалыг хүртсэн билээ. Энэхүү жүжиг нь үзэгчдийн эрэлт хэрэгцээнд нийцсэн учраас цаашид тоглооч гэсэн үзэгчдийн санал ирсээр байна.
Жүжигчин Ц.Баясгалан нь Эмэгтэйчүүдийн баярыг тохиолдуулан ээжүүд, охид бүсгүйчүүддээ зориулан эх хүний зүрхнээс эгшиглэх бүүвэйн дуу хэрхэн үүссэн домгийгүндэсний язгуур урлагийн төрөл уртын дууны шуранхай, үндэсний бүжиг, аман хуур, хөөмэйний урлагаас оруулж, “Зүрхний дуулал” нэг хүний драмыг хийж, 2014 оны оны 03 сарын 14,15,16-нд 19:00 цагаас Улсын Хүүхэлдэйн Театрын тайзнаа тоглохоор бэлтгэлээ хангаад байна.
Жүжгийн зохиолыг МУСГЗ зохиолч Б.Галаарид бичиж, ерөнхий найруулагчаар Масс студийн захирал Д.Сангибат, ерөнхий зураач МУСТА Ц.Энхтуяа, Хөгжмийн зохиолч МУСТА Д.Түвшинсайхан, Туслах найруулагч МУСТА Ц.Инъяахүү, Ерөнхий менежер МУСТА Б.Нямсүрэн, Оёдлын мастер Ц.Оюун-Эрдэнэ, Морин хуурч МУСТА Р.Амарбаяр нар ажилласан байна.
МУСГЗ, МЗЭ-ийн шагналт зохиолч Б.Галаарид ганц хүний “Тэнгэрийн аялгуу” жүжгээ энэ цаг үеийн авьяаслаг жүжигчдийн нэг Ц.Баясгаланд зориулан бичжээ. Жүжгийн гол агуулга нь орчлон ертөнцийн бүх зүйл, од эрхэс, хүн, цэцэг ногоо хүртэл хоорондоо амьд холбоотой, харилцан хамааралтай байдаг бөгөөд түүнийг өөрчлөх гэсэн аливаа оролдлого сүйрэл, гай гамшиг, зовлон авчирдаг, гараг эрхсийн юм бүхэн байх ёстой байрандаа байх аваас амар амгалан, аз жаргалтай байна гэсэн утга санааг илэрхийлжээ.
Жүжгийн үйл явдал балар эрт цагт өрнөнө. Тэнгэрийн таван гүнжийн нэг нь тал нутгийн жирийн нэгэн монгол залууд дурласны улмаас эрхэс тэнгэрээс хүн төрөлхтнийг амар амгалан амьдруулахаар илгээдэг байсан шидэт аялгууны хөг алдарна. Гүнж тэнгэртээ эргээд гаръя гэтэл үр хүүхэд төрүүлж, хань ижилтэй болж, газрын амьдралд дассан байна. Үүнээс гол зөрчил эхэлж, ээдрээтэй, хурц өрнөлтэй, хүнд хэцүү үйл явдлууд ар араасаа өрнөнө.
“Тэнгэрийн аялгуу” нь сэтгэл догдлоосон хурц сонирхолтой үйл явдал, уран яруу хэл, гайхамшигтай сайхан хөгжим, тайзны содон өвөрмөц шийдэл, найруулагчийн ер бусын хурц сэтгэлгээ, жүжигчний асч дүрэлзсэн тоглолт, хязгааргүй авьяас нэгдэн цогцолсон гайхамшигт бүтээл, үзэгчдэдээ өргөн барьсан хамгийн шилдэг бүтээлүүдийн нэг байх болно.
Эрхэм үзэгчид та бүхэн ижийтэйгээ ирж, энэхүү сайхан бүтээлийг таалан соёрхоорой!!! Дэлгэрэнгүй мэдээллийг 8808-8868 утаснаас авна уу!