Улсын хүүхэлдэйн театрын уран бүтээлчид энэ зургаадугаар сарын 1-10-ны өдрүүдэд ОХУ-ын Эрхүү хотод зохион байгуулагдсан “Байкальский Талисман” олон улсын үндэсний театруудын наадамд амжилттай оролцлоо. Тус хамт олон эл наадамд Т.Энэрэлийн зохиол, Б.Даваасүрэнгийн найруулга “Морин хуур” жүжгээрээ оролцсон байна.
Өнөө жилийн наадамд оролцогчид үндэсний уран зохиол, тууль, ардын аман зохиол зэрэг эх сурвалжаас сэдэвлэсэн жүжгүүдийг үзэгчдэд толилуулснаараа онцлог байсан аж.
Гурав дахь удаагаа зохион байгуулагдаж буй тус наадамд ОХУ, Монгол, Беларусь, Хятад, Армени зэрэг улсуудын төлөөлөл 20 гаруй театрын 400 гаруй уран бүтээлчид оролцсон бөгөөд ОХУ-ын Эрхүү хотод А.Вампиловын нэрэмжит Хүүхэд, залуучуудын театр, Охлопковын нэрэмжит драмын театр, Загурскийн нэрэмжит хөгжмийн театр, Иркутскийн театрын коллеж, Иркутскийн драмын театрын тайзнаа тоглож, 5000 гаруй үзэгчдэд толилуулсан аж.
Наадмыг зохион байгуулагчид, шүүгчид Улсын хүүхэлдэйн театрын “Морин хуур” жүжигт жүжгийн онцлох чанар, жүжигчдийн ур чадвар, үзэгчдийн сэтгэлд хүрсэн байдлыг үнэлэн олгодог “Серебреной Омуль” шагналыг олгосон байна.
Ташрамд дурдахад, Улсын хүүхэлдэйн театрынхан “Морин хуур” жүжгээ 2024 онд нээсэн бөгөөд эл уран бүтээл нь “Гэгээн муза-18” олон улсын театрын наадмын хүүхэлдэйн жүжгийн төрөлд шилдэг бүтээлээр шалгарсан бүтээл юм.
