Архангай аймгийн төв Эрдэнэбулган сумын төв талбай Г.Дэмид жанжны талбайд 16 метр өндөр, 12 метрийн өргөнтэй Богд Зонхова бурхны зээгт наамал шүтээнийг залж, аравнайлж байна.
Богд Зонхова бурхны зээгт наамлын хамгийн дээд хэсэгт гурван цагийн бурхныг бүтээжээ. Гурван цагийн бурхан гэдэг нь өнгөрсөн цагийн Одсүрэн бурхан, одоо цагийн Бурхан багш, ирээдүй цагийн Майдар бурхан юм.
Гол хэсэгт Богд Зонхова бурхан арслан ширээн дээр нар, саран дэвсгэр дээр очир завлилаар, ном номлохын мутарлахаар оршиж байна. Баруун мөрөн дээр нь билэг билгийн илдийг урласан байна. Энэ нь мунхагийн үндсийг үндсээр нь таслах бэлгэдэлтэй. Зүүн мөрөн дээр нь ширнэн буюу хоосон чанарын сургаал номлолыг бэлгэджээ.
Доод хэсэгт Богд ламын тааллын шавь болох Чалцанжав, Хайдавжав хоёрын гар дээр Богд ламын айлдсан бодь мөрийн зэрэг, тарнийн мөрийн зэрэг судрыг барьжээ.
Богд Зонхова бурхны зээгт наамлыг урлахад “Гурван шүтээн” урлангийн үндсэн урлаачдаас гадна гучаад урлаач оролцож, зургаан сарын хугацаанд урлажээ.
Зээгт наамалд 16х12 хэмжээтэй 300 м.кв торго, 800 метр зээг, 192 метр бэрзэнт, 250 метр олс, 192 метр даавуу оржээ.
Мөн Зая гэгээний анхдугаар болон дөрөвдүгээр дүрүүдийн гүдүнг дархан цаазат Булган уулын энгэрт орших Галданзуу хийдэд залах ёслол боллоо.
“Зая гэгээний хүрээ гэгээрэл” бясалгалын өдрүүд зургаадугаар сарын 24, 25-нд болно.
