ШУА-ийн Түүх, угсаатны зүйн хүрээлэн, ОХУ-ын ШУА-ийн Алс дорнодын салбарын Алс дорнодын ард түмний Түүх, археологи, угсаатны зүйн хүрээлэнтэй хамтран 2018 оноос хэрэгжүүлж буй “Дотоод азийн эзэнт гүрнүүдийн хот суурин” төслийг хэрэгжүүлж буй бөгөөд төслийн хүрээнд Монгол улсын нутагт буй Уйгур болон Хятаны үеийн цэргийн бэхлэлт суурингуудад археологийн малтлага судалгааны ажлыг явуулж буй билээ.
Тус төслийн хүрээнд 2025 онд Төв аймгийн Заамар сумын нутагт орших Хэрмэн дэнж хэмээх хульширсан балгасанд археологийн малтлага судалгаа явуулж буй бөгөөд олон арван сонирхолтой хэрэглэгдэхүүнийг илрүүлэн олсоор байна.
Хамтарсан төслийн судлаачдын үзэж байгаагаар эл балгас нь Уйгур улсын үед эх үндэс нь тавигдаж хожим Хятан улсын үед цэргийн зориулалттай суурин болгон дахин засварлан ашиглаж байсан болохыг тогтоожээ.
Тус төслийн хээрийн судалгааны ажилд монголын талаас төслийн удирдагч, доктор Л.Эрдэнэболд, Б.Очир, магистр У.Өлзийдулам нар, ОХУ-ын талаас төслийн удирдагч, академич Н.Н.Крадин, доктор А.Л.Ивлиев, профессор С.А.Васютин нар ажиллаж байна.
Хээрийн судалгааны ажил 2025 оны наймдугаар сарын 1-30-ны хооронд үргэлжилнэ.
