Монгол дахь НҮБ-ын Хүүхдийн Сан, Монголын контемпорари балетын хөтөлбөр, УДБЭТ хамтран хүүхдийн сайн сайхны төлөөх балетын үдшийг аравдугаар сарын 16-нд 18.00 цагаас УДБЭТ-т толилуулах гэж байна.
Энэ үдэш Монголын сонгодог болон модерн бүжгэн жүжгийг анх удаа нэг тайзнаас үзэх боломж нээгдэхийн сацуу хүүхдийн эрүүл мэндийг хамгаалахад чиглэсэн үйл хэрэгт хувь нэмэр оруулах боломжтой болно.
“Амьдралыг тэтгэгч O2” модерн балетын тоглолтыг шинэчилсэн найруулгаар анх удаа тоглох гэж байгаа бөгөөд энэхүү бүтээлийг НҮБ-ын Хүүхдийн Сангаас санаачлан бүтээж, 2019 онд Монголд нэг л удаа тоглож байсан юм.
Мөн Монголын үндэсний шилдэг сонгодог урлагийн бүтээлийн нэг болох Монгол Улсын Төрийн шагналт, Ардын жүжигчин Жамъянгийн Чулууны “Уран хас” бүжгэн жүжгийг хэсгээс тоглоно.
Балетын үдшийн тасалбарын нийт орлогыг хөдөө орон нутгийн гэр цэцэрлэгүүдийн нүүрсээр галладаг зуухыг халж, НҮБ-ын Хүүхдийн Сангийн Монгол гэрийн халаалт, дулаалга, агаар сэлгэлтийн CHIP багц суурилуулах ажилд хандивлаж, 1000 гаруй хүүхдэд эрүүл, аюулгүй орчинд өсөж хөгжих боломж олгох юм.
