Цагаан ордон цагаачдын баривчилгааны бичлэгт Сабрина Карпентерын “Juno” дууг ашигласан нь маргаан дэгдээгээд байна. Грэммийн шагналт дуучин, ая зохиогч Сабрина энэ бичлэгийг хорлонтой бөгөөд жигшүүртэй гэж тодорхойлов. Мөн “Хүнлэг бус зорилгодоо хүрэхийн тулд намайг болон миний хөгжмийг хэзээ ч бүү ашигла” гэж цахим хуудсандаа бичжээ.
Сабрина Карпентер аялан тоглолтынхоо үеэр “Juno” дууг дуулахдаа гавлуулж, баривчлуулж байгаа мэтээр жүжигчилсан тоглолт тавьдаг аж.
Гэвч Цагаан ордон түүнээс уучлал гуйсангүй. Харин оронд нь “Сабрина Карпентерт товч бөгөөд тодорхой хариулт өгье. Бид бид аюултай гэмт хэрэгтэн, хууль бус алуурчид, хүчирхийлэгчид, педофилуудыг албадан гаргасныхаа төлөө уучлалт гуйхгүй. Тэр мангасуудыг өмгөөлж буй хэн бүхэн тэнэг л байж таарна” гэж Цагаан ордны хэвлэлийн төлөөлөгч Абигейл Жексон мэдэгджээ.
Сабринагийн дууг ашигласан бичлэг цахим сүлжээнүүдээр гарсаар байна.
Цагаан ордон дуучдын уран бүтээлийг тэдний зөвшөөрөлгүйгээр ашигласан тохиолдол нэгээр тогтохгүй. Тухайлбал, өнгөрсөн сард Эх орны аюулгүй байдлын яамнаас нийтэлсэн ижил төстэй бичлэгт Оливиа Родригогийн “All-American Bitch” дууг ашигласан байжээ. Мөн дуучин Ашерын “Hey Daddy (Daddy’s Home)” дууг ерөнхийлөгчийн бичлэгт дэвссэн гэх мэт өөр олон ч тохиолдол байдаг аж.
