“Гарц” олон ангит киноны эхний бүлгийг өнгөрсөн 2024 онд, хоёрдугаар бүлгийг “Номадиа” пикчерс, “Фалко” энтертайнмент хамтран бүтээж, 2025 оны наймдугаар сараас үзэгчдэд хүргэсэн. Тэгвэл яг одоо тус “Гарц” олон ангит киноны үргэлжлэл болох “Гарц-3: Төгсгөл” уран сайхны кино бүх кинотеатруудаар гарч буй. Эл уран бүтээлийн гол дүрүүдийн нэг болох Хуягийн дүрд жүжигчин Т.Оюунболд тоглосон.
Т.Оюунболд сурагч ахуйгаасаа Ардын жүжигчин Г.Гомбосүрэн агсны нэрэмжит “Халзан тавхай” хүүхдийн урлагийн наадамд сургуулиа төлөөлөн оролцдог байжээ. Тэр үеэсээ жүжигчин болох хүсэлд хөтлөгдөж, улмаар СУИС-ийг 2009-2013 онд суралцаж дүүргэжээ.
Энэ 2025 онд Т.Оюунболд “Гарц”-аас гадна “Халуун бороо” уран сайхны киногоор мөн үзэгчидтэй “уулзсан”. Монголын гал сөнөөгчдийн эр зориг, хүнлэг сэтгэлийн бодит түүхээс сэдэвлэн бүтээсэн энэхүү уран бүтээлд тэрбээр мөн л гол дүрүүдийн нэгд тоглосон юм.
