Италийн нэрт дуучин, хөгжмийн зохиолч Лаура Паузиниг ирэх хоёрдугаар сард нээлтээ хийх цагаан олимпын нээлтэд оролцоно гэж зохион байгуулагчид зарлалаа.
“Милан-Кортина 2026” өвлийн олимпын наадмын нээлтийн ёслолын ажиллагаа хоёрдугаар сарын 6-нд Милан хотын Сан Сиро цэнгэлдэхэд болно. Нээлтийн ёслолыг “Balich Wonder Studio” зохион байгуулах бөгөөд Америкийн поп од Мэрайя Кэри тэргүүтэй алдартнууд оролцохоор төлөвлөж байна.
Урлагийн салбарт хэдийнээ дэлхий даяар танигдсан Лаура 30 гаруй жилийн хугацаанд Грэмийн шагнал хүртэж, Оскарт нэр дэвшсэн түүхтэй нэгэн.
Өдгөө 51 настай итали дуучин бүсгүй 2020 онд “Seen” дуугаараа Алтан бөмбөрцөг наадмын шилдэг дуугаар шалгарсан билээ. Ингэснээр энэ наадмын шилдгээр шалгарсан анхны итали хэл дээрх дуугаар тодорч байжээ.
Швейцар найруулагч Эдоардо Понтигийн 2020 онд дэлгэцийн бүтээл болгосон “The Life Ahead” киноны албан ёсны дуу болох “Seen” тэр жилийнхээ Оскарт нэр дэвшсэн билээ.
Түүнчлэн 2004 онд итали, испани хэл дээр гаргасан “Escucha” цомгийнх нь испани хэл дээрх хувилбар нь 2006 оны Грэммийн наадмын шилдэг латин цомгоор нэрлэгдсэн удаатай. Ингэснээр тэр Грэмми хүртсэн анхны бөгөөд одоогоор цор ганц итали дуучин юм.
