“Торгоны зам-2026″ урлагийн наадамд Булган соёлын ордны дэргэдэх бүжгийн дугуйлангийн сурагчид “Бардам бүсгүй” бүжгээр хоёрдугаар байр эзэлсэн бөгөөд удирдсан багш Г.Сэлэнгэ шилдэг багшаар шалгарч цомын эзэн болжээ.
Энэхүү хамтлаг бүжгийн төрөлд шалгарсан “Бардам бүсгүй” бүжгийг МУСТА Г.Сэлэнгэ багш дэглэсэн байна.
“Торгоны зам-2026” нь Монгол, Орос, Хятад гурван улсын хамтарсан олон улсын уралдаан бөгөөд гуравдугаар сарын 28-наас дөрөвдүгээр сарын 1-ний өдрүүдэд БНХАУ-ын Хөх хотын “Улаан театр”-т болж, 16 улсын тамирчид ардын бүжиг болон бусад урлагийн төрлөөр оролцсон байна.
Уг уралдаанаар торгоны зам дагуух соёл, спорт, аялал жуулчлалыг сурталчлах зорилготой бөгөөд 2024, 2025 онд өргөн дэлгэр зохион байгуулж байжээ.
Булган соёлын ордны дэргэдэх бүжгийн дугуйлан 20 гаруй жил тасралтгүй хичээллэж, жил бүр 160 орчим хүүхэд багачуудад бүжгийн боловсрол эзэмшүүлж, улс, бүс, аймгийн уралдаан тэмцээнд тасралтгүй оролцож, хавар болгон тайлан тоглолтоо хийж хэвшээд байгаа ажээ.
