Монгол Улсын Ерөнхийлөгчийн ивээл дор зохиож буй “Her Presience in Colours” олон улсын эмэгтэй зураачдын үзэсгэлэнгийн нээлт өчигдөр Монголын уран зургийн галерейд болж өнгөрлөө.
Дэлхийн олон оронд толилуулсан, нэр хүндтэй бүтээлүүдийн үзэсгэлэнг Монголд анх удаагаа дэлгэж байна. Үзэсгэлэнг Соёл спорт, аялал жуулчлалын яам, Олон Улсын эмэгтэй зураачдын холбоо, Монголын уран зургийн галерей, “Тэнхлэг – Урлаг” ТББ хамтран зохион байгуулж байгаа юм.1993 оноос эхлэн хоёр жил тутамд зохиогдож ирсэн бөгөөд БНХАУ, Малайз, Солонгос,Англи, Австрали,Америк, Вьетнам зэрэг олон оронд энэхүү үзэсгэлэн гарч байжээ
Монгол Улсын Ерөнхийлөгчийн Тамгын Газрын дарга П.Цагаан олон улсын эмэгтэй зураачдын төлөөлөл болон үзэсгэлэнг зохион байгуулж буй монгол уран бүтээлчиддээ талархал илэрхийлэн тууз хайчилж, үзэсгэлэнг албан ёсоор нээсэн юм.
Монгол Улсад нээлтээ хийж буй энэ удаагийн үзэсгэлэнд 18 орны 124 шилдэг зураач оролцож бүтээлээ дэлгэж, нээлтийн ажиллагаанд галерейн танхим дүүрэн уран бүтээлч, урлаг судлаач, уран зураг сонирхогч, үзэгчид цугларсан байлаа. Монгол улсаас 24 бүсгүйчүүд монгол зураг, уран зураг, каллиграф, чимэглэх урлагийн төрлөөр хийсэн бүтээлүүдээр оролцож байгаа аж.
www.URLAG.mn
