Хайку шүлэгчдийн “Хязгаараас цааш” бүлгэмийн хоёр дахь уран бүтээл болох “Мэдрэхүйн байгаль” хайку шүлгийн түүвэр монгол, англи хэлээр хэвлэгдэн гарчээ. Уг түүвэрт Б.Бүрэнбилэг, Г.Дарьням, Н.Идши /Идо/, П.Надалсүрэн, А.Содхүү, Л.Таванбаяр, Н.Төвшинзаяа зэрэг долоон хайкучийн 250 гаруй бүтээл багтсан аж.
Номын редактор АНУ- ын яруу найрагч, хайкун мастер Эд Бремсон, орчуулагч Н.Төвшинзаяа, дизайнер Н.Идши /Идо/, уран бичээч Ц.Тамир, фото урлаач Б.Ариунболд нарын уран бүтээлч хамтран ажилласан байна.
Монгол, англи хэлээр хэвлэсэн энэхүү түүвэр яруу найраг, хайку сонирхогчдод төдийгүй судлаачид, орчуулагчид, утга зохиолын багш нар, оюутнууд, сурагчид зориулагдсанаараа онц- логтой. “Мэдрэхүйн байгаль” хайкун түүвэр нь энэ урлагийн дэг жаяг, мөн чанар, үнэт зүйлс, Зэн буддизмын үндсэн ухагдахуунуудыг шингээсэн, бясалгал төвлөрөлд суурилан туурвисан хайку урлагийн чанартай бүтээл болсныг урлаг судлаачид онцолжээ.
Д.ЦЭЛМҮҮН
